Вакчиесь иворъёс «люкасько»

Балтач, Бурай, Ермекей, Илиш, Калтасы, Кушнаренко, Татышлы, Янаул ёросъёсысь удмурт гуртъёсын но школаосын «герӟа». «Аспӧртэм ужрад яке вормон сярысь школаын, гуртын гинэ медаз тодэ, со мукет ёросъёсы но мед вӧлмоз», - малпасько.

Школаосысь иворъёсын ӵем дыръя монэ организаторъёс тодмато. Иворъёс люкатозям, телефонэн вераськон «дуннеын» улыса, олокыӵе югдуръёсын, учыръёсын но пумиськоно луисько.

«Нырысетӥ урок йылпумъяськиз. Перемена вакытэ кык-куинь школаосы жингыртыны вуо», - малпасько ас поннам.

Жин-жин! – кылӥське проводлэн мукет пумаз. Кин ке но трубкаез ӝутӥз но ӝог шуэ:

- Кин? Мар кулэ?

Ӟечбуръяськисько, кин, кытысь луэмме верасько.

- Мон – техничка, нокыӵе ивор вераны уг тодӥськы. Нош ик жингыртэ, дышетӥсьёс трубкаез ӝутозы, - ӝог гинэ вераз кышномурт. Пик-пик-пик…

Малпаськонэ уси: дышетӥсьёс телефон висъетын пуко бере, малы меда трубкаез со кышномурт ӝутӥз? Оло урок дыръя жингыртысал ке.

Куддыр одӥг телефон пыр куинь кузя но вераськыны ӧдъяськом. Усто пӧрме вылэм. Татышлы ёросысь одӥгез школаысь дышетӥсен республика конкурсын вормемзы сярысь вераськиськом. Вераськонамы куинетӥ адями «итӥськиз». Куараезъя тодмай - школаен кивалтӥсь.

- Кема-а вераськыны малпаськоды ай тӥ? – юа воргорон.

Номыр вазьытэк кылзӥсько. Вераськонамы директор «ватсаськытозь» монэным вераськись кышномурт телефон пыр кивалтӥсен вераськон мытӥз.

- Мон «Ошмес» газетын ужасьёсын вераськисько, нылпиосмылэн вормонъёссы сярысь ивортӥсько, - валэктыны выре дышетӥсь. Нош кивалтӥсь сое уг но кылы, ялан аслэсьтыз зуле, солы, пе, телефон кулэ.

- Тау. Ӟеч луэ, - шуисько проводлэн мукет пумаз монэ кылӥсьёслы.

Та вераськонъёсысь таӵе йылпумъян лэсьтӥ: телефонэн вераськон амалъёслы адямиослы дышетсконо на.

Газетчиос калыклы выль ивор вуттон сярысь сюлмаськыса ужало. Уго газет лыдӟись понна печатлаське. Но малы ке но тросэз озьы уг малпало. Кылсярысь, со ик кивалтӥсь. Номыр уродэз ӧй луысал, дыр, кивалтӥсь ачиз редакцие жингыртыса, утэм вормонзы сярысь верасал ке. Нылпилэн котькуд вормонэз дышетӥсьлэсь, школалэсь данзэ ӝутэ угось. Командировкае потакумы, Янаул ёросысь одӥг школаен кивалтӥсь та пумысен тазьы шуиз: «Ужаны быгатӥськом, конкурсъёсын, ӵошатсконъёсын но вормылӥськом, нош ужмес адӟытыны ум быгатӥське».

Шонер, журналист ивор люканы, котьмаин тунсыкъяськыны кулэ. Но со огдыре котькытын луыны уг быгаты. Куддыр бадӟым, тунсыко ужрадъёс но палэнэ кылё. Нош соос сярысь ивортӥсь луысал ке, газетын ужасьлы со бадӟым юрттэт луысал, ужрадэз дасясьёслы но радъясьёслы – шумпотон но дан. Вераны кулэ, сыӵе адямиос пумисько, но соос туж ӧжыт.

Туннэ нуналэ адямилэн улоназ интернет бадӟым инты басьтэ. «Вконтакте», «Одноклассники» сайтъёсысь пичизэ но, пересьсэ но шедьтыны луэ. Интернет вотэс пыр журналистъёсын но герӟаськыны капчи. Куд-ог школаосысь дышетӥсьёсын контакт пыр кусып возисько. Вань ке иворды – гожтэлэ. Гожъямъёстэс «Ошмеслэн» электрон почтаяз но келяны быгатӥськоды.

Котькуд школалэн нимысьтыз сайтэз вань. Но тросэзлэн школаослэн со выльдэмын ӧвӧл. Та ӧрын пусйымон ужало Янаул ёросысь Каймашабаш,Татышлы ёросысь Выль Татышлы школаос. Ортчытэм ужрадъёссы, вормонъёссы сярысь гожъямъёссэс соос сайтъёсазы котьку дыраз интыяло. Страницаоссэс усьтӥсько – отын монэ выль ивор вите ини.

Азьло адямиос телефонъёстэк но, ог-огенызы гожтэт пыр герӟаськыса улӥллям. Иворъёс но ӝог шараяськиллямтэ. Туала улонын та пумысен сюлмаськонэз ик ӧвӧл. Котькыӵе иворез матысь дыр куспын дуннее вӧлмытыны луэ. Витисько иворъёстэс.