Пичи дыре кылем штание

Пичи дырысьтым тодӥсько на, кыӵе секыт вал кылем даурлэн пумаз дӥськут басьтыны. Городъёсы араз огпол мыныса, анай-атай кезьыт дыръя школьной форма вылэ дӥсяны кофта басьто вал. Дышетскон ар бырытозь солэн саесъёсыз пӧсьто вал. Сокем трос кимес ӝутӥськом вал меда школаын, дышетӥсьёслэн юанъёссылы «мон, мон верасько» шуса?

Семьялы ма но со басьтоно ке луэ, анай басьтэм вузлэсь зэмос дунзэ ноку но атайлы уг вера вал, котьку пичиятэ вал. Яке воксё кин ке дорын возе вал, со сярысь вераны тупась учыр шедьытозь. Малы со озьы каре меда шуыса, уг но малпаськиськы вал соку.

Школаын пичи классъёсын дышетскыкум трикотажлэсь клёш брюкиен костюм туж модной дӥсь лыдъяське вал. Сыӵе дӥськут асьсэ нылпиоссылы дышетӥсьёс гинэ басьтыны быгато вал, дыр. Бадӟымгес будэм бере мынам но дышетӥсьёслэн нылпиоссы кадь дӥсяськем потыны кутскиз. Нош милям анаймы кык нылъёсыз вордскем бере ик таӵе кылъёс верам: «Мынам нылъёсы ноку брюкиен уз ветлэ». Соин, гуртысьтымы магазинэ брюкиен костюм вуэ ке, дунзэ шори люкыса, кофтазэ анай басьтэ вал, нош брюкизэ дышетӥсьлэн пиналыз дӥсялляз. Огпол песяйме но бӧрдыса ик сюлвори клёш штани басьтыны, ӧз кылзӥськы. Со брюкиез нуллымтэелы али ке но ӧбкелисько.

Берло, куке анаеным ӵош кенешыса дӥськут басьтыны кутским ни, куспамы вераськиськом вал, выль вузмы сярысь атайлы кызьы но ма вераломы. Озьы капчигес улыны. Со – алдаськон ӧвӧл, дыр, семья куспын керетон-даллашон медаз пот шуыса тыршон. Пиосмуртъёслэн психологизы воксё мукет бере кышномуртлэсь, соослы номыр кулэ ӧвӧл бере. Тодыны мед тодоз, но ваньзэ ӧз ке но тод, умойгес луоз.

Аслым дӥськут кемалась ачим басьясько ни. Мон понна самой умой но яратыса нуллон дӥсь - малпамтэ шорысь басьтэмез. Брюки но нуллӥсько. Анае берло ачиз ик валаз, кыӵе со шуныт но тазалыкез утьыны умой дӥськут. Пӧртэм сямен турттӥсько, дӥськутлы укыр трос уксё ке кошке, куд-огзэ али но атаелы уг вераськы. Солы но ӵемысь маке но басьтыны тыршисько. Нырысь ӟургетэ: «Малы басьтӥд нош тае? Кытчы мон ветлӥсько? Сотэк но дӥсе трос». Кӧня ке нуналскын учкисько: дӥсям. «Шуныт вылэм та», - шуэ. Мар кулэ на пересь муртлы – шуныт но саклык висъям.