-15 °С
Яркыт
Антитеррор
Вань иворъёс
Пӧртэм-пӧртэм
3 августэ 2019, 11:00

Адямилы оскон ыше

«23-тӥ пӧсьтолэзе анае сюрес вылын аварие шедиз. Со ӵыжы-выжыосмы дорысь таксиен бертэ вал. Но, жаляса верано, дорамы ӧз вуы…»

Алигес вконтакте вотэс бам пыр тодмоелэсь таӵе гожтэт вуиз. Отысь чуръёсты лыдӟыса, бам кузя курыт синкылиос быльырскизы. Син азям пуктӥ нылкышнолэсь та дыре туж куректӥсь нылпиоссэ. Оло нунокъёсыз но вань ни, дыр, солэн. Одӥгаз магазинын котьку монэ мусо серекъяса пумитась нылызлэн но синъёсыз синкылиосын тырмемын, луоз. Макем курыт адӟон.
Сюрес вылын кык капчи машинаос донгиськиллям. Пумит «лобись» машина шӧдтэк шорысь такси шоры мертчиськем. «Анае руль сьӧрын пукисьлэн бераз интыяськемын вылэм. Со ик утем, лэся, солэсь улонзэ. Таксист бырем, - азинтӥсько гожтэтэз лыдӟонме. – Анаелэн позвоночникез тӥяськемын. Озьы ке но эмчиос ӟечезлы оскыто».
Нылкышно быдэс нуналзэ комаын ортчытэм. Уйин, дас кык час тырыку, солы операци лэсьтыны кулэ. Зэм, со понна 246 сюрс коньдон кулэ луоз. Коньдон адямилэсь улонзэ утьыны юрттоз.
Гожтэтын нылкышнолэн нылызлэн банк картаезлэн номерез пусъемын. Кема пуки со лыдпусъёс шоры учкыса. «Коньдон выжтоно? Юрттоно адямиослы? Оло куке ачим но таӵе кышкыт югдуре шедё?» - малпаськи. Но озьы ке но коньдон выжтонэн малы ке ӧй дырты. Гожтэтын пусъем банклэн картаез сьӧрам ӧй вал угось.
Ӝытазе тодмоелы анаезлэн тазалыкез пумысен юаса гожтыны дӥсьтӥ. «Анаен номыр луэмын ӧвӧл. Со нокыӵе аварие ӧз шедьы. Сюрес вылэ но ӧз пота», - валэктӥз со мыным. Берло валатски: та нуналэ Надя, ачиз со сярысь чик тодытэк, вотэс бамысьтыз вань эшъёссэ секыт ивор сярысь гожтэтэн кышкатэм. Нош та вакытэ кинъёс ке чидатэк витизы, дыр, Надялэн эшъёсызлэсь коньдон выжтэмзэс…
Пӧяськон. Пӧртэм амалэн коньдон поттон сярысь сюлмаськон. Туннэ тросэз таӵе кылъёсын кышкатэк шудо. Та выкытэ кин ке малпа меда адямилык сярысь? Яке туала вакытэ со воксё ышемын ни? Азьланяз кызьы осконо та выллем иворъёслы? Матысьёсмы кышкыт учыре шедьыку, сыӵе иворез пӧечиен лыдъянлэсь Инмар мед утёз. «Таӵе ивор интернет вотэсэ вӧлмемысь возьдаськисько», - шуэ Надя. Но, малпасько, егит ныллы та нуналэ шумпотоно: солэн анаез таза, пиналъёсызлэн вормонъёссылы шумпотыса, улон сюрес кузя азьлане йыгмыт вамыштэ. Нош возьдаськыны кулэ пӧечи ивор вӧлмытӥсьёс. Сыӵе сямзы кылемын на ке соослэн.
Ольга
НИГАМАТУЛЛИНА.
Читайте нас в