Ӟеч куазь но узыр ю-нянь курылӥзы

Кыкетӥ гудырикошконэ Ильин нуналэз пусйиськом. Асьме палан сое Элин нуналэн тодо. Нош Удмурт Элькунын «Виль» нимало. Калык праздниклэн вань аслыз гинэ тупась чакланъёсыз, кудъёсыз азьвыл дырысен туннэ нуналозь но утисько на.

* Ильин нуналэ калык одно ик ӟеч куазь но узыр ю-нянь курылӥз. Куазь кема зорытэк улӥз ке, Ильялэсь зоръёс курылӥз. Нош зор-котъёс дыръя – шунды но кӧня ке кӧс нуналъёс.

* Та нуналэ трос зориз ке, тылпу ӧжыт луоз.

* Кыкетӥ гудырикошкон бере чибиньёс но кузькукъёс куртчылӥськемысь дугдо.

* Ильин нуналэ гужем йылпумъяське. Луылӥз озьы но: ӵукна гужем ке вал, лымшор бере сӥзьыл зоръёс но кутскылӥзы.

* Ильин нунал турын люканы уг яра, сое тылпу «ньылоз» шуыса лыдъяллязы.

* Ильин нуналысен кӧжыез октыны яра.

* Кыкетӥ гудырикошконэ кӧс луиз ке, со бере эшшо куать арня зорытэк улоз.

* Ильин нуналэ куазь зориз ке, тари удалтоз.

* Кыкетӥ гудырикошконысен уй кузьгес луэ.

* Син усемлэсь мозмытскон понна, Ильин нуналэ усем зор вуэн ымнырез миськоно.

* Ильин нуналэ зор улэ кылид ке, быдэс ар таза улод.

* Та нуналэ одӥгез валтӥсь сям – шуръёсын но ӵыпетъёсын пыласькыны уг яра ни. Соку вуэ сьӧд кужымъёс пыро шуыса лыдъяллязы.

* Кыкетӥ гудырикошконэ ужаны уг яра ке но шуизы, зортэм дыръя пӧртэм турын-куаръёс дасяллязы. Кылсярысь, зангари сяська, эмезь, тӧдьысяська, сезьы, пыштурын но мукет.

Дасямын интернетысь материалъя.