Сюлэмез уд пӧя

Натӥ пичигес удмурт гуртын будӥз. Туэ со 11-тӥ классэ йылпумъяз. Школаын дышетскон аръёсаз Натӥ эшъёссэ кырӟаны-эктыны усто быгатэменыз паймытъяз. Со котькытчы вутске: школаын но азьветлӥсьёс пӧлын, дораз но анай-атаезлы юрттӥськыны тырше. Экзаменъёсаз но солы удалтӥз, Натӥ ӟеч тодон-валанэныз висъяськиз. «Таӵе оценкаосын педагогичес кой академие пырыны быгатоно ни», - малпаз со экзаменъёссэ пыр потэм бераз. Ӝоген солы ивортӥзы, Наталья Петроваез вылӥ дышетскон юртэ, пе, кутӥллям. Таӵе иворлы Натӥлэн анаез но пумтэм шумпотӥз. Табере солэн нылыз улонын аслэсьтыз сюрессэ шедьтоз, дышетӥсь луоз.

Гудырикошкон толэзь пумын Маша апай нылзэ городэ келяз. Табере солэн Натӥез – студентка. Егит ныл вылӥ дышетскон юртын шумпотыса тодон-валан басьтыны кутскиз. Татын но со котьку усточиос пӧлын. Натӥ трос конкурсъёсын вормисьёс пӧлын луиз ни. Со сцена вылысь чик уг пота, кожалод. Отысен ик, дыр, сое синйылтэм ньылетӥ курсын дышетскись студент. Туннэ со Натӥлы тӧдьысяськаослэсь бадӟым керттэт кузьмаз. Кӧня ке нунал ортчыса, егит ныллэн телефоназ кин ке жингыртӥз. Коля сое киное вазе вылэм.

-Мыным кык билет сётӥзы, - вазиз Коля. – Одӥгзэ тыныд кузьмаме потэ. Ойдо ӵошен кино учкыны вуылом.

Натӥ пумит ӧз луы. Студентъёс «Нырысь яратон» кино учкизы. Кинотеатрысь потыкузы, Натӥлэн бамъёстӥз синкылиосыз быльырало вал. «Эн куректы. Киноын гинэ озьы луэ», - буйгатыны тыршиз сое Коля.

Ӝоген Коля дышетсконзэ йылпумъяз, солы армие повестка сётӥзы. Солдатэ келямзылэсь азьвыл, егит пи яратонзэ дораз куное вазиз. Солэн Натӥзэ анаеныз тодматэмез потӥз. Но анай сюлэм пизэ ӧз вала. «Юрттэт кулэ ке луиз, эшъёсылы вазиськы», - шуиз Коля Натӥезлы поездэ пуксьыкуз. Нош собере бордаз юн-юн ӟыгыртыса зарни зундэс кузьмаз. «Мон тыныд туж ӵем гожъяло, жингыртыло. Яратӥсько тонэ», - кыдёке шуккиськиз на вуоно солдатлэн куараез.

Со дырысен ӝыны ар ортчемын ни. Натӥ нуналлы быдэ сямен Колилэсь гожтэтъёссэ басьтылэ. Но берло со воксё ышиз. Соин Натӥ Колялэн анаезлы жингыртоно кариськиз. «Тон эн ни жингыртылы татчы. Коля мукетсэ нылэз яратэ», - Света апаезлэсь кылъёссэ кылыса, Натӥлэн синъёсыз синкылиен тыризы.

Коля, службаез йылпумъяськем бере, куинь арлы контракт гожтӥз на. Озьы ке но егит ныл оскиз, яратонэз дораз бертоз шуыса. Луд вылысь тӧдьысяськаосыз но котьку шуылӥзы «Яратэ!»

Одӥгаз гужем нуналэ Натӥ анаеныз возь вылэ узыяны мынӥзы. Нош бертыкузы капка азязы тодмотэм машина сылэ ни вал. Со куспын отысь тӧдьысяська керттэтэн Коля потӥз. Натӥ сое адӟыса, аслаз синъёсызлы ик ӧз оскы кадь.

- Ӧд тодма ни, оло, вунэтӥд шат? – вазиз со Натӥ вӧзы вуыса. – Отпуске бертӥ. Кема ӧвӧл эштэ пумитай. Соин вераськыса, аслэсьтым бадӟым янгышме валай. Анай шуиз: «Натӥед тонэ солдатэ басьтэмзы бере ик семья кылдытӥз». Соин тыныд жингыртыны но, гожтыны но ӧй дӥсьты ни. Вунэто, кожай. Но сюлмы ӧз кылзы монэ, тон доры куриськиз…

Виктория КИРЬЯНОВА.

Пермь шаерысь Чайковский город.