-18 °С
Салкым
Антитеррор
Вань иворъёс
Пӧртэм-пӧртэм
27 Июля 2019, 10:04

Кузьымлы - кузьым

Узы трос шедьтӥзы.

Узы трос шедьтӥзы. Кыксы но сьӧразы ваем посудазэс тырмытӥзы ни, но горд-горд кисьмам емышо кыр интыос огез бӧрсьы мукетыз адӟисько на, соосты кельтыса кошкыны жаль потэ. Галя пичи нылзэ чортэ но нош ик бичаськонзэс азинто. Сиськыны ваем няньзэс быдтыса, узызэс табере бушам полиэтилен пуйые тыро.
- Ой, Ларисок, – часэз шоры учкыса вазиз анаез, - дырлэсь ортчемзэ шӧдытэк кылиськеммы ук. Автобусэ ум вуэ ни. Мар каромы на?
- Сюроз ай мар ке со, - шуиз нылыз.
Озьы ке но, бертыны потӥзы. Пыдын сюрес вылтӥ вамышъякузы, Ларисалэн жадемез шӧдӥськиз ини. Татын шунды но юнгес пыже, пашпуос котырын, узы бичакузы, озьы ӧй вал. Ӵукна мыныкузы, бадӟым сюресысен Кионнюк дорозь кыдёкын ӧз поты, нош берлань туж кема лыкто кадь. Дыртыса вамышъязы ке но, гуртазы ветлӥсь автобусэ ӧз вуэ…
Шоссе валлин кыс-тӥськись канава дуре пуксизы. Татысен кыдёкысь арамаос, гурезё бамалъёс адӟисько. Со сяна, бусыосын юос веттасько. Тӥни, ӟег ӵужектэм ни, ӝоген быдэсак кисьмалоз. Мукет дыръя Лариса ваньзэ чакласал, синйылтысал, нош али ялан сюрес шоры учке.
- Бертэмед потэ-а ини? – юаз Галя нылызлэсь.
- Потэ, - шуиз но йырзэ анаезлэн ал вылаз понӥз.
Нош соосты пуктоно кадь машина уг вуы, ялан грузовойёсыз гинэ ортчыло. Кабинаязы шофёр вӧзын кин ке но луэ одно ик.
…Каньсырам нылызлэсь йырсиоссэ тупатъянъяз, Галя эшшо одӥг тапала лыктӥсь машинаез адӟиз. Ларисаез вырӟытыны дӥсьтытэк ӧз султы, кизэ гинэ ӝутӥз. Нош шофёр солэсь мар куремзэ валаз, ӵапак вадьсазы дугдӥз. Лариса сазьтӥськиз, тэтчыса султӥз но бадӟым КамАЗ доры бызиз, узыен тырмем банказэ но вунэтӥз. Галялы ваньзэ ныпъятэк ӧйлась. Ярам, шофёр ӟеч адями вылэм, юрттӥз. Ачиз васькиз но Ларисаез ӝужыт кабинае тубытӥз. Собере Галялэсь пичи ведразэ, пуйызэ, банказэ кутыса возиз, кышномурт пуксёнэ интыяськем бере, ӧссэ ворсаз.
Отӥяз вырӟизы. Соку ик шофёр вазиз:
- Ойдолэ тодматскоме. Ато кузь сюрес вылын огнам лыктыса акыльтӥз ини… Кызьы тынад нимыд, нылаш?
- Лариса. Нош аниелэн – Галина, Галина Ивановна.
- Кӧня арес тыныд?
- Мыным – вить, нош анаелы кызь ньыль.
- Озьы вылэм, - шуиз руль сьӧрын пукись адями.
Собере кытысь узы бичамзы сярысь юаз, Ларисаез трос бичамез понна ушъяз.
Огшап мынэмзы бере, пальпотыса выльысь вазиз:
- Нош мынэсьтым нимтулме ӧд юалэ… Мынам нимы Петро, фамилие – Таратут. Та-ра-тут. Тумошо-а?.. Монэ исаса, такмак но кырӟало:
Таратут да Таратут –
Сегодня там, а завтра тут.
Краснодар палась мон, казак выжыысь. Тӥни соин фамилие сыӵе. Али тӥляд республикаяды емышъёс ворттӥськом. Лымшор палан вуизы ини соос.
Трос мадьысал на, дыр, кузь сюрес вылын ветлӥсь шофёр, но гуртэ пыризы.
- Ми, тӥни, отчы васькиськом, - киыныз возьматӥз Лариса.
- Слушаюсь отчы васькытыны! – йӧн-йӧн вазиз Таратут. Собере бадӟым машиназэ каллен гинэ дугдытӥз.
Галя апай кисыысьтыз кӧня ке копейкаос поттӥз но шофёрлы мыче. Соиз пумитъяське:
- Уг, уг басьты коньдондэс. Таӵе чебер апаез, таӵе визьмо нылашез дунэн нуллыны сьӧлык.
- Иське, мелэ, узымес басьтэ, - возьмамтэ шорысь ӵектӥз Лариса. – Со милям трос.
- Узыдэс? А давай мон сое басьто. Туж ческыт, дыр, со, тӥни зыныз кабина пушкы кыӵе вӧлмиз. Нош пунэмзэ…
Озьы шуиз но, мышказ сылӥсь сумкаысьтыз эшшо но ческытгес зыно улмоос поттылыса, нылаш азе тырыны ӧдъяз. Пумитъяськемзэс лыдэ ӧз басьты ни. Кабинаысь васькыны юрттӥз но бӧрсязы киыныз шонаса кылиз.
Лариса Таратутлэн машинаез син азьысь ышытозь учкыса сылӥз. Галя но доразы пыронзэ вунэтэм, лэся: капка азязы султыса, КамАЗ бӧрсьы учке…
Андрей
ГИЛЬМАЕВ.
Читайте нас в