Чебер кыз

Чилекъяса гудыръямез кылыса, Иван шуак сайказ. Педлон тӧл шаугетэ, бускельлэн калай липетэныз шалтыртэ, азбарысь кызьпуос кыкна пала някыръясько. Бератаз тӧл эшшо но кужмояз. Вань дунне вырӟиз кадь, сильтӧл одӥг сэреге но вуытэк, одӥг арбери борды но йӧтытэк ӧз кыльы, дыр.

Ӟардон азьын куазь басылскиз. Котырак чалмыт луиз ке но, мӧйы лесник умме усьыны ӧз быгаты ни. Кӧня ке пол укно доры вуылӥз. Адӟиз со: тӧл таяз учыре но поръяса лекъяськем. Дас кык ар талэсь азьло ортчем кышкыт сильтӧл но тазьы ик дауртӥз вал. Бадӟым нюлэсэз со быдтӥз соку, трос писпуосыз погыръяз. Быдэс гужем ӧз тырмы тӥям участокъёсыз тазатыны, кечат-вамат усьылэм писпуос кӧня ке ар ӵоже син азе йӧтылӥзы на.

Тӥни соин туннэ сюлэмыз шуг луиз Иванлэн. Ӵукна султэмез бере, чай юиз но, мотоциклэз вылэ пуксьыса, нюлэс пала кошкиз. Нош зор ведра дурен кисьтэм, лэся, питранъёс нӧдэ выё, азьлань но, берлань но мыныны уг вормо. Озьы но тазьы но Бермуш шур дорозь вуыса, Иван выж вылтӥ потӥз но «Восходзэ» нюлэс кушысь одӥг пинал ньылпу сьӧры ватыса кельтӥз. Ачиз собере пыдын вамыштӥз, 53-тӥ но 54-тӥ кварталъёсы кожылытэк, просекетӥ ортчиз. Отын тросэз алигес мерттэм писпуос, пинал пипуос но беризьёс будо, соослы сильтӧл йӧтэм ке но, ӵок ини, изъянэз бадӟым уз лу. Тани 55-тӥе дыртоно, отын, лесникъёс шуэмъя, строевой кызъёс но ньылпуос сыло. Соосын мар луиз меда? Быгатӥзы-а возькыны сыӵе кужмо тӧл шорын?

Тӥни кварталлэн грань юбоез но адӟиськиз. Просекысь кожыса, Иван меӵак писпуос но куакъёс пӧлтӥ кошкиз. Пограм писпуосыз адӟыса, сюлэмыз вӧсь луиз ке но, со ялан азьлань вамыштӥз. Та кварталэз ваментӥсь нёжал доры вуыса, сайкыт интые потэмез бере гинэ ӧжытак буйгатскиз кадь. Номыр но луытэк, азьвыл сямен, ас интыяз сылӥсь Чебер кызэз адӟиз но пальпотӥз со…

Трос пол курылӥзы ни та кызэз лэсьтӥськон материал басьтӥсьёс, выль корка ӝутӥсьёс. Нош Иван, кыӵе ке но муг шедьтыса, ялан сое кельтылӥз.

- Мон тыныд мукетсэ шедьто, - шуылӥз со юась муртлы. – Эн кайгыры, табере выжлы тёсэз но, вӧлдэтлызэ но паськыт уг пилё ни.

Нош валлян сое колхозын алигес ужаны кутскем егит председатель правление ӧтиз но таӵе вераськон мытӥз:

- Иван агай, детсадмы ёркыт луиз веть-ай ини. Тани воспитательёс нунал пӧрат сямен мон доры пырало. Садик ке садик мед луоз, пе, со: нылпиослы шудыны но, изьыны но, сиськыны но нимаз висъетъёс, пе, лэсьтоно. Мукет колхозъёсын табере озьы ини. Асьмелэн гинэ, дыр, садикмы сыӵе пичи, вуж на… Озьыен, Иван агай, выльзэ ӝутоно. Правлениын со сярысь кенешимы ини. Нош со понна ӟеч материал, таза писпу кулэ луоз. Быгатод-а шедьтыны сыӵезэ? Сюресэз но машинаен пырымон мед луысал.

- Шедьтыны луоз, дыр, - шуиз лесник.

- Шедьтоно, Иван агай, обязательно... Конешно, кирпичлэсь но ӝутыны луысал, но созэ-тазэ, цементсэ шедьтытозь, ворттытозь трос дыр ортчоз. Собере мынам садикез юри пулэсь лэсьтытэм потэ: кор шуныт но сётэ кадь, мускыт но уг лу отын, кӧс улэ. Педласянь тёсэн обшить карим но чебер буёлъёсын буям ке, выжыкылын кадь сылоз. Нош укнооссэ бадӟымесь кароно, югыт мед луоз. Озьы бере, янаклы ярась писпу но утчано.

- Янаклы мон Чебер кызэз сёто.

- Кызьы, кызьы?

- Чебер кыз. Писпулэн нимыз сыӵе.

- Оло, Иван агай, лесникъёс писпуослы но ним сётъяло ини?

- Ваньмызлы уг. Но шедьыло вань котыр шаерлы тодмо луэмъёсыз но. Ми соосыз котьку синйылтыса улӥськом... Со кызэз мон, нокинлы сётытэк, кема вози, утялтӥ. Нош садиклы сёто, обязательно сёто. Шулдыр, югыт мед луоз нылпиослы...

- Вот-вот, - шумпотӥз председатель. - Тӥляд нылпиостылэн нылпиоссы но ветло, дыр, ини отчы?

- Уг ветло. Ӧвӧл мынам нылпиосы но, нылпиосылэн нылпиоссы но.

- Одӥг но?

- Вань вал пимы. Кыдёкысь ӧз берты ни. Сыӵе учыре шедиз тӥни сюрес лэсьтонын. Отын лушкаськисьёсты кутыкузы ыбиллям. Ачим жугиськонлэсь берлось куинь арзэ тыл пыртӥ ортчи, улэп кыли, нош пимы та вакытын пуля улэ сюриз...

Пукон вылын пукись Иванлэн сӥльвиро мугорыз син азьын губырскиз кадь, ӵем будӥсь сьӧд йырсиез пӧлын пурысьтам нюжаос тросгес адӟиськизы.

Малы меда озьы юаны шедьтӥ шуыса куректӥсь председательлэсь малпанзэ куспетӥ карыса, Иван вазиз:

- Ойдо эн сюлэмшугъяськы, дыши ини мон со кайгулы. Бускельёсмылэн, мукет муртъёслэн шудо нылпиоссы ваньысь шумпотыса улӥськом кузпалыным... Ярам, озьыен, вераським: писпу шедьтом, ӵуказе ик возьмато. Строительёс мед лыктозы.

Правлениын сыӵе вераськон бере кыктой но ӧз ортчы на, пусъем Чебер кызэз погыртыны ӧз вуэ. Нош уин тани сильтӧл ӝутскиз но лесниклэн нырысь ик сюлмаськонэз та писпу сярысь вал. Со доры ик дыртӥз тани Иван, нӧд коласа, куаръёс вылысь но турын вылысь зор вуэн котмыса-сучырмыса лыктӥз. Чебер кыз шоры учкыса сылӥз но собере ваземез потӥз солы:

- Улэп кылемед вылэм, Чебере... Туж умой, туж умой... только тани тонэныд люкиськыны но вакыт вуэ. Мар бон карод, озьы кулэ.

Яратэм писпуэз выжыын кылам-бурамез бере гинэ, нюлэс утись воргорон мукет кварталъёсы, мукет делянкаосы вамыштӥз. Ваньзэ эскере, сумкаысьтыз тетрадьзэ поттыса, мар ке пусйылэ но гожъялля. Нош ачиз ялан мышсэ учкылэ, нёжал дурын будӥсь Чебер кыззэ адӟемез потэ.

«Люкиськиськом, Чебере, - сипыртэ со. - Эн ӧпкеля ини: ӟеч интые, нылпиослэн шудазы келясько тонэ».

Озьы малпа но со син азяз пальпотӥсь пинал ымныръёс пуксё, пель сьӧраз пичиесь пиослэн но нылъёслэн жингрес куараоссы кылӥсько кадь.

Андрей ГИЛЬМАЕВ.