Вань иворъёс
Пӧртэм-пӧртэм
13 Июля 2019, 10:00

Бертӥз солдат...

Новелла

Бригадир малы ке ӝытазе лыктӥз. Азьвыл сямен, укно улэ дугдыса гинэ ӧз вера со мугзэ, корка пыриз. Ӟечбуръяськиз но кӧттыр дасяса бергась Палайлы вазиз:
- Дыды, тыныд ӵуказе станцие мыноно луоз. Районысь звонить каризы: асьме гуртэ кин ке фронтысь, пе, бертэ поездэн, сое пумитаны мынод. Ӵукна вазьгес ик вырӟод. Стрелокез кыткы, ява, мон конюхъёслы верай.
Бригадир ачиз малы ке палэнэ учке, пал кылем кизэ я кисыяз донге, я пиджаксэ тупатыны выре. Мукет номыр ӧз вераськы ни, кошкыны дыртӥз…
Чырткем ужпиен Палай станцие ӝог вуиз. Поездъёс оген-кыкен ортчо но ортчо, нош отысь васькисьёс пӧлын тодмо муртъёс уг адӟисько.
Уйин ӧжыт гинэ чырым карем егит кышномурт нырулыны кутскем вал ини – эшшо одӥг поезд вуиз. Товарной вагонъёсыз но вань солэн, пассажирскойёсыз но. Вагонъёсысь потӥсьёсыз эскеронъяз, Палай ваземзэс кылӥз.
- Кто из Тылогурта? Граждане, кто из Тылогурта? – зол черекъяса юа тӧдьы халатэн но йыраз горд киросо ялыкен мӧйы кышномурт.
Палай со вагон доры мынӥз. Вазьыса ӧз ву, санитарка юаз:
- Ты что ли из Тылогурта?
Палай йырыныз шонтӥз. Санитарка ӝог гинэ берен вагонэ пыриз но кунултыса солдат дӥсен воргоронэз поттӥз. Палай сое соку ик тодмаз, нош мар карыны, мар вазьыны уг тоды.
- Кин лыктӥз Тылогуртысь? – сэзь куараен юаз солдат.
- Мон, Васьлей агай, мон.
- Кин бон-ай тон?
Солдат котырак утчаське, ачиз номыр уг адӟы, шӧдӥське. Палайлэн пыдессинъёсыз жильтрак луизы но мырдэм вазиз:
- Палагия мон, Ӟедымлэн нылыз.
- А-а, тон-а ма, кен?.. Валэн лыктӥд, дыр?..
- Валэн, Васьлей агай.
Палай солдат доры вамыштӥз, нош кунултыны кепыраз, лэся, китӥз гинэ кутӥз но каньылэн валтыса нуиз…
Кыӵе но малпанъёс ӧз бергалэ сюрес вылысен егит кышномуртлэн йыраз! Кызьы пумиталоз Фаркана кенак сукыр картсэ? Мар шуозы нылпиосыз? Соос номыр но уг тодо на уга…
Аслаз Бектэмыр картэз но тодаз лыктэ. Кудпал эльёсын ветлэ меда ини со табере? Оло, кытын ке вирен орсмыса кылле? Оло, со но… «Ой, йырыкае, йырыкае, кыӵе адӟон-курадӟон но ӧз вайы ини та жугиськон!» Палайлэн бамъёсысьтыз синкылиосыз васько. Куаратэк бӧрдэ со, шӧдытэмез уг поты.
Уробоын пукись синтэм воргорон кӧня ке чалмыт улӥз, собере юалляськыны кутскиз. Солэн ӝоггес тодэмез потэ вордӥськем палъёсыз, гуртоосыз сярысь. Ас сярысьтыз пал кыл но уг поттылы. Выльгуртэз ортчыса, асьсэ гуртсы пала вуыку гинэ сюлэмшугъяськыны кутскиз, лэся. Азьпала но, урдэслань но учкылэ. Адӟыны быгатымтэзэ но адӟыны тырше кадь…
Тани вайвоже но вуизы, гуртазы пырись сюресэ кожизы. Соку Васьлей уробоысь васькиз но каллен гинэ пыдын вамыштӥз. Валэн ветлон сюрес вылтӥ мыныны шуг луэмысь, Палай сое Варади шур дурысь возь вылэ валтӥз.
Кык-куинь пол гинэ вамыштӥз солдат небыт турын вылтӥ, киоссэ вӧлъяз но шуак кымин выдӥз. Палай кышказ. Матысь ана вылын картофкалы сюй ӝутъясьёс – та дырозь интыязы пумыса сылӥсь нылкышноос но нылпиос – мар ке ӵашетыны кутскизы, гурак! воргорон доры бызизы.
Васьлей султӥз. Адӟисьтэм синъёсысьтыз синкылиоссэ ӵушылӥз.
- Тодмай, туганъёсы, - шуиз со, - вордӥськем палме. Зынызъя тодмай, Варадилэн жильыртэмезъя тодмай…
Люкаськем адямиос кин солдат борды ӟыгыртӥське, кин озьы гинэ кизэ сётэ, кин бертэм сюресэз сярысь юа. Шумпото но, бӧрдо но. Викышъяса солы кизэ сётӥз Федок. Васьлейлэн матысь эшезлэн, ӵошен будэм огъёзэзлэн кузпалыз со. Кемалась, пе, ӧвӧл ини Иванэзлэн иворез. Шугъяське кышномурт, сюлмаське.
Буйгатӥз сое солдат:
- Шедёз, Федок, уроме но. Бертоз. Асьмелэнъёс немецез караз улляло ини. Улэп кылемъёсыз ваньмыз бертозы, эн кайгыре…
Шокпотыса вуиз но Васьлейлэн чыртыяз ошиськиз егит нылаш.
- Атай! - кеськиз со.
Ас ӝуждаз луэм нылзэ ӟыгыртыса, йырзэ маялля атаез. Нош соиз бӧрдонзэ кутыны уг быгаты. Ӧз чидалэ ни куаратэк викышъясь нылкышноос но.
Тӥни соку синтэм солдат йырзэ ӝутӥз но вазиз:
- Мар луиз, туганъёсы? Марлы бӧрдӥськоды? Тани мон бертӥ… Мынам мугоры таза, киосы-пыдъёсы сэзесь. Эн бӧрдэ огды но, синкылидэс эн поттэ… Ойдолэ, гуртэ вамыштоме. Сазьтӥське, Васьлей бертэ мед шуозы, солдат бертэ мед шуозы!
* * *
Эн пыкылы, лыдӟись эше, тылогуртъёсыз, картофка мерттэм ана вылысь ужзэс куштыса гуртазы бертэмзы понна. Васьлеез дораз вуытозяз келязы соос, Фарканалэн шумпотонэныз, нылпиосызлэн, туганъёсызлэн, бускельёсызлэн шумпотонэнызы пачылмизы соослэн сюлэмъёссы.
Берло соос, оло, дас пол ӝутскем мылкыдын ужазы…
Андрей ГИЛЬМАЕВ.