Яратӥськод ке монэ, шуба кузьма, мусое!

Поликлиникаын эмчилэсь лыктэмзэ витьыса пукисько. Вӧзам кык егит анайёс интыяськизы. Нуныоссы кӧло. Соос туж тунсыко вераськон мытӥзы. Нырысь кузпалъёссэс «сӥсъязы», бӧрысь ог-огзылэсь дӥськутъёссэс эскерыны кутскизы.

- Выль аре картэ мыным 150 сюрсэн шуба кузьмаз. Уфае мыныса басьтӥмы, - вера одӥгез.

- Чебер, - пальпотыса шуэ мукетыз. – Кузпалыд тынад «зарни». Мон ини куинетӥ арзэ та шубаме нуллӥсько.

- Зарни-а, ӧвӧл-а, уг тодӥськы. Уж со бордын ӧвӧл. Уж мон бордын. Кузпаллэсь коньдонзэ быгатыса «кысконо», - ушъяське нырысетӥез.

- Кызьы? - паймыса юа эшез.

- Яратӥськод ке, азьланяз но монэн улэмед потэ ке, мыным шуба кузьма шуыса верад ке Игоредлы, со одно ик басьтоз, - дышетэ эшсэ быгатыса коньдон кыскись.

- Ӧйтод, яратоно адямиелы мынам сыӵе кылъёс вераме ик ӧвӧл, - паймыса йырзэ сэзъя кыкетӥез.

Эмъюртын кылэм-адӟемме лумбыт йырам бергатӥ. Сыӵе ик кылъёс вераса, мон но кузпалме эскерыны малпай. Тунсыкъяськыса хоккей учкись картэ нырысь мар верамме ӧз но вала. Кыкетӥ ползэ верам бере, со малпаськись тусын шорам учкиз но каллен гинэ шуиз: «Туннэ ик-а кузьмалом?». Нокыӵе кариськытэк, нош ик хоккей дуннеяз «выйиз».

Валай, мынэсьтым номыр ӧз пӧрмы. Бӧрысь малпанъёсам асме ик янгыше уськытӥ. Зэм, котькуд егит ныл азьланяз улонзэ тӧдьы валысь принцен герӟаса, шудо луыны малпа, дыр. Но ваньмыз малпамъя гинэ уг луы, улонлэн аслаз куронъёсыз, ӵектонъёсыз.

Вераны кулэ, дунне вылын котькуд адями ас сяменыз шудо луэ. Кин ке но шудзэ, шуом, дуно шубаен, трос коньдонэн герӟа. Мукетыз шудзэ нылпиосыз бордысь адӟе, куинетӥез вӧзаз кужмо тыбыр пыкъетэз луэмен шудо.

…Нош зэмос яратонлы дунне вылын мертэт вань меда?