Выль вамыш

Соос автобусын пумиськизы. Соку Таня мӧзмыт синъёсын укное учкыса мынэ вал. Бамыз сьӧд тушен наштаськемын, йырсиез тус-тас лэзьямын. Котыр дунне солы пеймыт но кӧшкемыт потыны кутскиз: гажанзэ мукет нылэн адӟиз. Сюлэмзэ ныж пуртэн вандӥзы кадь.

Тани остановкаез ялӥзы. Автобус дугдӥз, кин ке пыре, кин ке потэ. Шӧдтэк шорысь нылаш вӧзы кыӵе ке пияш пуксиз. Кияз - лемлет розаос. Со ныллэсь каллен викышъямзэ адӟиз. Оло, соин мылкыдзэ ӝутыны малпаз.

- Нош таиз тӥледлы! - шуиз но киысьтыз сяськаоссэ Таня пала мычиз.

Куашкам тусо нылаш со шоры серем пыр учкиз но пальпотӥз.

-Тау, но кулэ ӧвӧл. Мон тӥледыз уг тодӥськы.

- Мон вань сюлмысьтым кузьмасько!

- Со понна мон тӥледлы мар сётыны кулэ?

- Номыр кулэ ӧвӧл!

- Уг оскиськы!

Таня йырзэ укно пала берыктӥз. Пияш сяськаоссэ бордаз ӝиптӥз но вуоно остановкаын потыкуз шуиз:

- Одӥг адямилы оскондэ ыштӥд ке но, эн ышты быдэс дуннелы оскондэ.

Ортчизы нуналъёс. Одӥг нуналэ Таня куректонзэ «веськатон» вылысь эшъёсыныз клубе позыръяськонэ мынӥз. Ох, шулдыр ик луиз нылашлы! Уката курытсэ веръямез бере. Йырыз берытскиз, вань дунне мусо потыны кутскиз. Ӧз но шӧды, кызьы со борды пияшъёс кырмиськизы. Эсьмаса, сьӧразы ӧтемзылэсь но ӧз палэнскы.

- А ты угости меня чем-нибудь! – серекъяса шуиз со огезлы армян пияшлы. Соиз пал пыд йылаз тэтчаса ик кошкиз барной стойка пала.

- Водку, водку со льдом! – кеськиз нылаш.

«Мон малпасько, тыныд сомында юыны кулэ ӧвӧл ни», - Танялэн пель сьӧраз вазись луиз. Берытскыса со барной стойка сьӧрын сылӥсь тодмо пияшез синйылтӥз. Нылаш сое азьвыл кытысь ке но адӟиз вал ини…

Азьпалзэ Таня уг тоды ни. Эшъёсыз берло веразы, барной стойка сьӧрын сылӥсь кыӵе ке пияш армянъёсын жугиськон поттӥз шуыса. Нош Таняез эшъёсыз дораз ваиллям.

Кыкетӥ нуналаз но Таня та клубе вуиз. Тодмо барменэз, утисьсэ, утчаз. Ӧз шедьты. Жугиськон поттэмез понна, сое ужысьтыз куштэмзы сярысь берло гинэ тодӥз.

Пӧсь гужем толэзьёс ортчизы. Кезьыт но кӧсыт сӥзьыл вуиз. Таня, дышетсконзэ быдтыса, гуртаз бертоно кариськиз. Сумкаоссэ люказ но, вокзалэ бере кылёнтэм вылысь, такси ӧтиз. Машинае пуксем бераз ик со таксистэз тодмаз. Егит пи но сое вунэтымтэ. Мусо синъёс выльысь пумиськизы.

- Кытчы тӥледлы, нылаш?

- Та городлэсь палэнэгес, - шуныт вазиз Таня.

Пияш пумитаз мыньпотӥз. Машина город кузя тӧл выллем ширтӥз. Кытчы со нуэ соосты, кин меда тодэ.

Елена НАБИУЛЛИНА.

Татышлы ёросысь Улысь Балтач гурт.