-18 °С
Салкым
Антитеррор
Вань иворъёс
Пӧртэм-пӧртэм
3 Июля 2019, 16:43

Уретэм кырӟан

Улонысь учыр

Виталиен тодматскыкуз, Маша тямысэтӥ классын дышетске вал. Бускель гуртысьтызы ӝужыт мугоро, чагыр синмо пилы со йырыз поромымон синмаськиз. Виталий но мусо нылэз синйылтытэк ӧз улы. Яратонзы сярысь ог-огзылы ӧз ке но вералэ, ӝуась синъёссы соослэсь мылкыдзэс шӧдытӥзы.
Пиналъёслэн дышетсконзы но, шутэтсконзы но ӵошен ортчылӥз. Виталий Машалэсь одӥг класслы вазьгес дышетскиз. Соин, лэся, со ассэ кужмоен, зэмос утисен лыдъялляз. Виталий Машаез итыме но «Восход» мотоциклэныз ужаны нуллӥз. Нылпиос соку колхозэ юрттӥськыны ветло вал угось. Нош одӥг пол соос машиналэн кузоваз пуксьыса, ёрос центразы куасэн ӵошатскыны мынӥзы. Тол куазен Маша кезьытэз но ӧз шӧды кадь. Гажанэзлэн ӟыгыртэмез, ыж кулэсь тулуп зол шунтӥзы сое.
Яратонэн тырмем школа аръёс туж ӝог ортчизы. Виталий, аттестат басьтыса, пединститутэ пырыны ӧдъя вал. Но баллъёсыз ӧз тырме. Вылӥ тодон-валан басьтыны малпась егит пилэн йыраз шуккизы кадь. Со армилэсь азьло шофёрлы дышетон курсъёсын дышетскиз. «Армия бере одно ик институтэ пыро!» - малпаз со. Нош Маша, школазэ пырпотыса, педучилищее пыриз. Пичи дырысьтыз малпанзэ быдэстӥз. Со пичи классъёсын дышетскись нылпиосты дышетоз. Со сӥзьылэ ик Виталиез армие басьтӥзы. Егитъёс люкиськыкузы вань улонзэс ог-огзэс яратыны кылзэс сётӥзы. Чидантэм мӧзмонэн но ненег чуръёсын тырмем гожтэтъёс гинэ ӧжыт буйгато вал яратӥсь сюлэмъёсты. Маша али ке но тодэ, мар гожтэмын вал котькудаз гожтэтын. «Мон берто но, ӵош луом. Одӥг минутлы но бордысьтым уг лэзьы», - гожтылӥз Виталий.
Нош одӥгаз шулдыр тулыс нуналэ кышкыт ивор вуиз. Телеграммаын гожтэмын: «Виталий кулӥз, сое ватыны лыкты…» Машалэн бам кузяз курыт синкылиосыз быльыразы. «Кызьы, мар луэм?» - пӧртэм малпанъёс бергазы солэн йыраз. Маша автовокзалэ бызиз. Виталиезлэн гуртаз нуись автобусэ пуксиз.
…Виталийлэн мугорыныз гробез ӵыжы-выжыосыз толэзь пала возьмазы. Солдатэз вордскем гуртаз ватӥзы. Егитъёслэн чебересь малпанъёссылы кылдымтэ вылэм быдэсмыны. «Уг быгаты Виталийтэк улыны. Быро», - малпалляз егит ныл ас понназ.
Маша вордскем палъёсаз но шергес вуылыны кутскиз. Нош бертӥз ке, нырысь ик яратонэзлэн шай вылаз кожылӥз. Та вакытэ со чылкак вунэтылӥз кадь Виталиез улэп ӧвӧл ни шуыса. Маша солы вань чебересь малпанъёссэ кисьтылӥз, кӧтӝожзэ вералляз.
…Маша, диплом басьтыса, гуртаз берытскиз, интыысь школае ужаны интыяськиз. Егит ныллэн сюлмысь тыршемезлы мӧйы дышетӥсьёс куддыр воксё паймылӥзы. Мария Петровна кык полэс ужез ас вылаз басьтылӥз. Та вакытэ Маша гинэ тодӥз, вылды, со Виталиез понна но тырше шуыса. Нуналъёс, толэзьёс, аръёс туж ӝог бызё ке но, егит ныллэн сюлмысьтыз яратон тылгизьыез уг кысы на. Со дышетӥсьлы азьлане вамыштыны кужым сётэ.
Флида ФАТХИЕВА.
Вылысь Татышлы село.
Читайте нас в