7000 километрез - велосипедэн

Дмитрий Бушмакин - Удмурт Элькунысь Дэбэсын улӥсь паймоно кадь удмурт пиосмурт. Дышетскемезъя – суреданы дышетӥсь. Нош тунсыкъяськонъёсыз пӧртэм. Алигес со Татышлы ёросэ вуиз. Маин шуоды? Велосипедэн! Дима аслыз «Хельсинки-Чемурай» веломаршрут малпаса, ветлэ сыӵе сюресъёстӥ, кытын уло удмуртъёс. Финляндиын улӥсь удмуртъёсын тодматсконэз кутскиз Сиппола городысен. Татын улэ удмурт-бигер семья, кудъёсыз доры куно корказы тросэн вуыло удмуртъёс. Финляндия, Эстония, Санкт-Петербург, Москва, Киров улосвыл, Татарстан, Башкортостан. Кылем арын кутскем велопробегзэ, вис карыса, туэ со Киров улосысь Светозаревоысен кутскиз. Нош йылпумъяськоз та тунсыко велосипедэн удмурт дуннеез котыръян Красноярской крайысь Чемурай гуртын. Ас мылкыдызъя, ас коньдонэныз 7 000 км сюрес вылэ потэм, номырлэсь кышкасьтэм пиосмурт пумиське удмурт калыкен, сюрес вылын адӟемъёсыныз люкиське, фильм лэсьтэ, нуэ «вконтакте» вотсэбамын аслэсьтыз велопробегезлы сӥзем группазэ. «Малы кулэ вал тыныд тазьы астэ жуммытыса ветлон?», - юатэк ӧй чида. «Огшоры но ветлыны луэ, кыӵе ке транспортэ пуксьы но мын, кытчы мынэмед потэ. Нош тазьы воксё мукет сямен пумитало кадь. Удмуртъёсты пӧртэм интыосын улӥсь удмуртъёсын тодматэме потэ», - валэктӥз со аслэсьтыз миссизэ.

Удмуртъёсты утчан сюрес вылаз гурезьёсыз ӧжытгес мед луозы, кышкытлыкъёслэсь палэнтӥ мед ортчоз, пумитаз ӟеч адямиос гинэ мед пумиськозы.