«…Мынӥ педэ, ужай крановщицаын, луи кондитер»

«Одноклассники» сайтын син азе йӧтӥз тодмоелэн эшеныз гожъяськемез. Дарья Дмитриева (Соколова) гожтэ: «Мынам школа бере артистэ мынэме потэ вал. Кышкай, тодмотэм адямиосын чупаськыны косозы шуыса. Собере малпанэ нош воштӥськиз: врач луо шуи. Медиклы но дышетскыны мыныны ӧй дӥсьты, малы ке шуоно кулэм муртъёслэсь кышкасько вал. Соин мынӥ «педэ», нош ужай крановщицаын. Озьы мон луи дорын ужась кондитер».

Курбатова Лидия Дарьялы гожтэ: «Нош мон пичи но егит дыръям котьку дышетӥсь луо шуисько вал. Али но асме тышкаськисько, малы отчы ӧй мын шуыса. Можга педучилищее мынэме потэ вал. Кинлэн кызьы улонэз пӧрме. Жаль, дырез берыктыны но выльысен кинлы потэ, сыӵе специальностьлы дышетскыны уг луы ни. Мынам туж потэ озьы кареме».

Тодмо суред. Ачим но со пыр ортчи. Одӥгаз дышетскон интые пырыса, ог арняскын валай, та профессия ноку но мынам уз луы шуыса. Янгыш лэсьтэмме дыраз валай ке но, ог арме ыштӥ. Куддыръя али но шонаськисько, шонер-а мынам сюресэ шуыса. Зэм, улонысь котькудӥз ортчем вис - со бадӟым опыт.

Пичи дырысенызы азьпал улонзылы профессизэс тодыса будӥсьёсты туж шер пумиталод. Янгышасько-а меда? Оло, туала школьникъёс мукетэсь, ма соослы кулэ, сое тодӥсесь, азьпалазы шонер ужпумъёс пуктыны быгатӥсесь? Нырысетӥ тодон-валан басьтон юртын дыр туж ӝог «бызе». Али гинэ нырысетӥ классэ вамыштэм еж нылпи шӧдыса но уг ву дас одӥг арлэсь ортчемзэ.

Котькуд пинал ас улонэзлы ачиз кузё. Со ачиз ик бырйыны кулэ азьпал улонзэ. Нош асьмелэн ӵемысь нылпиос понна анай-атайёс малпасько но «отчы мын», «татчы мын» шуо. Ӵемысь эшъёс кыӵе ке дышетскон заведение ӵош документъёс сёто. Гуртысь потэм нылпиослы та учыре нош анай-атайёссы вералозы: «Ӵош дышетскоды, ӵош улоды, ӵош бертылоды». Дышетӥсьёс но асьсэлэсь кылзэс верало, вылды, соиз яке таиз дышетскисьсы соослэн бурд улысьтызы потыкузы. Тросэз вуоно профессизэс бырйыку уждунзылэсь быдӟалазэ лыдэ басьто, вузъёсысь ортчон баллъёсты учко. Дышетскон интые пырон баллъёслэн быдӟалазы возьматэ специальностьлэсь «модной» луэмзэ. Нош кельше-а со тыныд, быгатод-а отын ужаны, со сярысь малпаськыса но уг уло.

Уже коньдон понна ӧвӧл, ужамед потыса гинэ мынӥд ке, басьтэм профессиед тынад шуыны луоз. Соин ужан удыс быръён борды туж малпаськыса но ваньзэ лыдэ басьтыса кутсконо.

Кематэк парта сьӧрын пукисьёс берпуметӥ гырлы улсы дышем школаосынызы люкиськозы. Котькудӥз шонер сюрес мед лэсьтоз.

Йылпумъян интые. Кондитер Дарья Дмитриева бер ке но, ас удыссэ шедьтэм. Нуналлы быдэ со семьязэ, эшъёссэ, тодмооссэ пыжиськемъёсыныз шумпоттэ, чебер туспуктэмъёсыныз милемын но люкиське.

Анна БАЙДУЛЛИНА.