Кызлэсь узызэ сиемды вань-а?

Кызузы, кызоузы. Тазьы шуо тулыс кызлэн вай пумъёсаз потылӥсь лемлет тусо пучыосты татышлы но калтасы удмуртъёс, нош литературной кылын со - кызаузы. Пиналъёслэсь юад ке, ма со сыӵе, со сярысь тодӥсьсэ уд но шедьты ни, вылды. Малы узы шуэмын, валамон, дыр. Тусын но, формаеныз но узылы кельшегес. Нош шӧмыз солэн - пичи дырлэн. Ӵапак соку сии мон та йӧспӧртэм узыез берлозэ. Алигес шуд усиз нылпиослэн спорт шудоназы ветлыны. Ортчиз со Татышлы ёросысь «Дэмен» СПК-лэн сабантуй ортчон возь вылаз. Нюкъёс кузя отын тросаз кызъёс будо. Куд-огаз вань кызузыез, куд-огаз ӧвӧл. Малы озьы, уг тодӥськы, оло, пиосмурт но кышномурт кызъёс вань, тунсыкъяськем ӧвӧл. Кызузыез ымам понэм бере ик тодэ лыктӥзы пичи дыръя ву дурын ӟазегпи утемъёс, кызузылы арамае потамъёс, бызьылыса шудэмъёс. Ӧй вунэты «заннягась» шуыны. Озьы шуо ми палан инкуазен сётэм сиёнэз нырысетӥ ползэ веръякуд.

Кызузылэсь тросгес сииськом мукетъёссэ инкуазен будэтэм турын-куаръёсыз. Пушнер, сарда, колыс, изьыгумы – малы ке но тулыс гинэ сиёно будосъёс. Кин мар пӧра соослэсь. Шыд, кутэм нянь, кин ке, кузятэмен сураса, пельнянь но сие. Ваньмыз ческыт пӧрме. Пушказы – тулыслэн шӧмыз, нырысетӥ витаминъёс, инкуазьлэн кужымез.

Анна БАЙДУЛЛИНА.