Кузь сюрес вакчи луиз

Комакгурт кыдёкын ӧвӧл бере, егит нылаш бертыкуз сюрес кузяысь магазинъёсы кожытэк уг чида. Нылкышноос сыӵе соос: сумкаяз шильыртӥсед вань-а, ӧвӧл-а, магазинэ одно ик пыроно.

Тани таяз радэ но, дышем сюрестӥз бертытэк, Аддок «Лымшор» магазин пыр бертоно кариськиз. Пырыкуз пал синмыныз адӟиз, машинаен тодмоосыз - Комакгурт пала бертӥсьёс - дугдӥзы шуыса. Аддок магазинысь ӝог гинэ потӥз но тодмоосыз пала вамыштӥз, Аляен вераськыны кутскиз. Кызьы, пе, вазьытэк, «бадӟым алма сием» шуозы.

Кӧня ке минутскын соос вадьсы, жуг-жаг куян контейнеръёс вӧзы, «Нива» машина дугдӥз. Аддок соку ик тодмаз водитель вӧзын пукись кышномуртэ – Елена Петровнаез - гуртысьтыз школаысь завучез. «Ой, Инмарлы но Елена Петровналы тау, тодмазы ӟеч адямиос! Туннэ пыдын бертоно уз луы», - малпаз но ӝог гинэ машиналэн берысь сиденияз интыяськиз Аддок. Пуксён сяменыз синйылтӥз: водитель палась Елена Петровнаен нокызьы герӟаськымтэ адями потӥз. Водителез но Аддок тодмаз: асьсэ палась ик бигер пи – Фаниль. Али со райцентрын улэ. Удалтӥз ук та шуыса, нылаш машиналэсь вырӟемзэ возьманы кутскиз. Нош йыраз пӧртэм юанъёс берганы шӧтазы: «Кызьы меда та Елена Петровна Фанилен тодмо? Мар каро соос одӥг машинаын?» Кема малпаськоно ӧз луы, водитель пыриз. «Умой-а, Аддок? – шуэ Фаниль. - Ужаса-а бертӥськод?»

Пумиськыкузы ярато соос куспазы сальтыртыны. Аддок - бигеро-удмурто, Фаниль удмурто-бигеро кылын маке но дугдытэк бӧтьырто. Туннэ но озьы ик луиз. Кӧня ке улыса, Елена Петровна Аддок шоры берытскыса учкиз. Егит ныл кытчы пыронтӥ но ӧз шедьты ни, ма вераны но ӧз тоды, му пыр вияно кадь луиз. Елена Петровна интые отын Фанильлэн кышноез пуке. Кызьы потоно та юмокысь, Аддок уг вала. Кӧня ке ӟудыса улӥз но, паймемзэ но, серем потэмзэ но ӧз возьматы. Нокыӵе кариськытэк, маке но вераны турттэ: «Тӥ та магазинлэсь кыдёкын уд улӥське кадь ук?». Нош машина азьлань мынэ но мынэ. Аддоклэн йыраз шуккиз, кузёосыз Фанильлэн вордскем гуртаз, Вужгуртэ, мыно, дыр, шуыса. Комакгурт вӧзысь заправка доры вуыса, Фаниль юаз: «Татчыозь тырмоз-а?» Серемзэ мырдэм кутыса возись нылаш пумитаз вазиз: «Тырмоз, тырмоз». Машинаысь потыкуз Аддоклы Фаниль шуиз: «Рэхмэт пуксемедлы».

…«Лымшор» магазин вӧзы дугдыса, Фаниль контейнере жуг-жагзэ куштӥз, луоз. Нош Аддок сое пуктыны дугдӥзы шуыса малпаз. Гуртэ пырытозяз но со ас понназ серекъяса бертӥз.

Анна БАЙДУЛЛИНА.