-17 °С
Салкым
Антитеррор
Вань иворъёс
Пӧртэм-пӧртэм
20 декабрь 2018, 16:42

Улмо

Милям бускелямы Вова агай улэ. Солэн укно улаз туж чебер бадӟым улмопу будэ. Тулыс ураме улмопу сяська зын лӧсъяське. Котькин писпу шоры синмаськыса учке. Улмопу гужем пумын уката чебер но гочатӥсь луэ.

Одӥг шулдыр нуналэ урамысь скамейкае пукыны потӥ. Улмоос кисьмамын ни. «Лыкты дорамы, бича милемыз», - шуо кадь соос. Эх, одӥгзэ ке но сиёно вал шуыса малпаськыса пукыкум, ӵапак Вова агай ураме потӥз. Мон пала вамыштэ. Кышканы кутски. Мынэсьтым лушкем малпанме шӧдэм, оло? Вӧзам вуиз но юа:
- Настя, улмо сиемед потэ-а?
- Потэ, - дӥсьтытэк гинэ вази.
-Мон улмоез дунтэк уг сётӥськы, – шуэ Вова агай.
- Одӥг улмо понна кӧня коньдон басьтоды? - юай возьдаськыса.
- Одӥг улмо понна одӥг кылбур верано, - шуиз Вова агай. - Ойдо сьӧрам, али ик сёто.
Соку ик сьӧраз мын вал, одӥг кылбур но тодам уг лыкты ни. Гужем ӵоже ваньмыз йырысь тӧлӟем. Кылбур но уг тодӥськы шуыны кепрес. Алдаськыны малпай:
- Вова агай, мон тӥ доры ӵуказе мыно, али маке но кӧты висе.
- Ярам, мон возьмало, - шуиз но бускеле дор палаз вамыштӥз.
Нош мон ӝоггес доре пыри но шкафысь полкаосысь книгаосты бугыръяны кутски. Тани « Шудмы огъя» кылбурез шедьтӥ. Туж умой дышетӥ но изьыны выдӥ. Кылбур чуръёс йырам пыраклы кылизы кадь.
Ӵуказеяз сайкай гинэ, улмо тодам лыктӥз. Укное учкисько – урамын нокин ӧвӧл. Ураме потӥ но Вова агайлэн укно ултӥз юри ветлӥсько ни. Улмоосыз эшшо но гордгес луиллям, лэся. Дыльды вияны кутскиз. Ма кароно? Лушкано, оло? Уз яра. Лушкаськыны умой ӧвӧл. Даша эше доры мыноно кариськи.
- Даша, кыӵе ке кылбур тодӥськод- а?- юасько эшелэсь.
- Марлы тыныд кылбур?- паймиз Даша.
Ваньзэ валэктӥ. Даша соку ик корказ бызьыса пыриз но кылбуръёсын книга поттӥз. Кыкнамы ик кылбур дышетыны пуксим. Собере ӵошен Вова агайлэн укно улаз вуим. Потӥсь ӧз луы бере, дораз пырыны малпам. Вова агай милемлы туж шумпотӥз. Валаз ни со марлы вуэммес.
Нырысь мон кылбурме вераны кутски вал, но Вова агайлы ӧз кельшы. Чебер, пе, уд вераськы. Кыкетӥ ползэ чебер, юн куараен верай. Даша но озьы ик вераны тыршиз. Вова агайлэн мылкыдыз ӝутскиз. Нош собере малы ке но синъёсыз нюромизы. Пинал дырыз тодаз лыктӥз-а меда? Милемлы со кык ведра улмо сётӥз но шуиз: «Кылбур дышетӥды ке, нош лыктэ».
Пиос азьын ушъяським. Соос со ӝыт ик Вова агай доры мынӥллям. Ку кылбур дышетыны вуиллям? Зэм, ваньзылы огмында улмо шедьымтэ. Кинлы ке вить, кинлы ньыль яке куинь.
Анастасия ГАРИФЬЯНОВА.
Янаул ёросысь Вуж Вараш школа.
Читайте нас в