-18 °С
Салкым
Антитеррор
Вань иворъёс
Пӧртэм-пӧртэм
14 декабрь 2018, 14:19

Милкалэн синкылиез

"Вакчи верос" конкурсэ

Пуны утэм куаралы Укабей кенак шуак сайказ. Урамын тём-тём пеймыт на. Кышномурт синзэ кыниз, нош умме усемез уг луы. Вӧтэз тодаз лыктӥз. «Нош ик Милкаме адӟи. Возь вылын мукет скалъёсын ӵош сиськыса ветлэ. Дырын-дырын быжыныз шонаське», - малпаське Укабей кенак.
Кышномуртлэн уммез тӧлӟиз. Скалэз сярысь малпанэз сюлэмзэ вӧсь каре.
Синмаськымон вал Укабей кенаклэн скалэз: тыр-тыр, ӝужыт. Бугро кадь, шуо ми палан. Йӧлыз но нап вал. Арлы быдэ таза кунян вайылӥз. Шумпотэ вал кышномурт, йӧлэз, йӧлвылэз, вӧйез аслаз шуыса. Скалзэ кышномурт вешаса, маялляса гинэ сюдэ-люкта вал.
Шӧдтэк шорысь гужем шорын Укабейлэн скалэз висьыны кутскиз. Кузёез сое син усемлэсь но пеллятӥз, першалэз но вазьылӥз. Номыр ӧз юртты. Скал син азьын восьмиз, синъёсыз пыдло кошкизы.
Мукетъёсын кенешыса, Укабей скалзэ сӥль комбинатэ лэзьыны соглаш луиз. Вераськыны вераськиз, нош кызьы люкиськоз меда? Кунянэз но пичи на. Анаез котырын тэтча, нюлэ сое. Чылкак пичи нуны выллем.
...Тодмотэм воргоронъёсыз адӟыса, скал султӥз, кышкатскиз. Валась синъёсыныз кузёез шоры учке, пыкылэ кадь: «Кытчы лэзиськод? Малы?» Сюраз гозы понэмзы бере но ӝуштыса пыкиське.
Кужмо воргоронъёс скалэз зур-зар гинэ машинае тубытӥзы. Укабей котмем синъёсыныз Милкаез шоры берпуметӥзэ учкиз.
«Осто, Инмаре! Скаллэн но синкылиез быльыраса ваське. Э-э-э, кайванэ, вераны гинэ уд быгатӥськы, ваньзэ валаськод. Кунянэд жаль, дыр. Ачим но атайтэк будӥ…» - сюлворе кышномурт. Эшшо ке, кунян куаразэ сётӥз, анаеныз люкиськемзэ валаса кадь. Пумитаз анаез но каллен бӧксӥз. Кузё кышно лапасэ пыдло пыриз, машиналэсь вырӟемзэ адӟонтэм вылысь. Кунянэз дорын со кема сылӥз, сое маялляса, вераськыса. Оло, кунянзэ буйгатыны выриз, оло, ассэ. Нош син азяз – синкылиен люкиськись Милкаез.
Сакина СУФИЯРОВА.
Калтасы ёросысь Бадӟым Качак гурт.