-15 °С
Салкым
Антитеррор
Вань иворъёс
Пӧртэм-пӧртэм
14 декабрь 2018, 14:12

Дырлы тунгон кулэ ӧвӧл

Нылпиосын ужасьёслы удмурт сценарий

Шудӥсьёс: Антон, Борис, Вовка – ньылетӥ классын дышетскисьёс; Тол бабай, Лымыныл.
Антон но Вовка сыло урам шорын. Киосазы – смартфонъёс. Синъёссы отчы мертчиськемын. Шудоназы копак выемын. Соос доры Борис вуэ.
БОРИС (эшъёсызлы вазиськыса). Салам, пиос! (Соосыз йырзэс уг ӝуто, номыр уг вазё). Пельтэмъёс луиды, иське. (Антонлы кизэ мыче).
АНТОН (Борислы). Эн люкет! (Кӧня ке вис бере). Yes! Yes! Вить сю очко утӥ!
Борис матэктэ Вовка вӧзы, кизэ мыче.
ВОВКА (Борисэз адӟымтэ улсы кариське). Гол! Вить: ноль! Аргентина – Ямайка пять: ноль!
БОРИС. Антон пельтэм, таиз синтэм. Синтэм-пельтэм уло, ява. Мон но синтэм-пельтэм карисько ай. (Кисыысьтыз смартфонзэ поттэ но шудыны кутске. Одӥг интыяз сылыны уг чида, отчы-татчы ветлэ. Собере тыпак дугдэ, кынтэм кадь луэ).
Тол бабай лыктэ. Пиос шоры кӧня ке дыр ӵоже паймыса учке, соосыз Тол бабаез уг адӟо.
ТОЛ БАБАЙ (Антон но Борис доры матэктыса). Тани тӥледлы, пиос, куке но лыдӟоды ай. (Пыд азязы куинь кесэг кагаз поныса кельтэ. Вовка доры матэктыса, солэн тыбыр сьӧраз султэ, котырак утчаське но пияшлэн кисыяз маке понэ). Таиз тыныд, пие.
Тол бабай, тыбырысьтыз песьтэрзэ тупатыса, кыштырак гинэ азьпала кошке. Кӧня ке вис бере пияшъёс доры Лымыныл шокпотыса вуэ.
ЛЫМЫНЫЛ (пиослы кужмо куараеныз вазиськыса). Пиос, Тол бабаез адӟиды-а? (Нокин уг вазьы. Антонэз кужмысь донге, соиз ӧжыт гинэ уг погра). Тол бабаез адӟиды-а, шуисько!
АНТОН. А? Мар?
ЛЫМЫНЫЛ. Сайкад-а? Мар тӥ тол куазен пиджакен ветлӥськоды?
АНТОН. Тол? Тон Лымыныл?
ЛЫМЫНЫЛ. Мон Гужемныл! (Вовкаен Борисэз но «сайкатэ». Соосыз бадӟым синъёсынызы учко Лымыныл шоры). Тол бабаез адӟиды-а?
ВОВКА. Кыӵе Тол бабай?
ЛЫМЫНЫЛ. Шарканысь Тол бабай!
ВОВКА. Тол вуиз шат? Дыр ассэ азьпалтыса бызе, оло? Али куарусён толэзь ук… (Смартфоназ учке). Ой, ой, ой, туннэ 31-тӥ толсур, пе.
АНТОН (озьы ик смартфоназ учке). Мынам но 31-тӥ толсур шуыса возьматэ… Асьмеос мукет дуннее ӧм вуэ-а?
ЛЫМЫНЫЛ. Ӝоген тӥ смартфон пушкады ышоды…
БОРИС (эшъёсызлы вазиськыса). Учке ай, пиос, пыд азяды кыӵе ке бумагаос костасько.
Антон но Вовка со бумагаосты ӝуто.
АНТОН (лыдӟе). «Дырлы», «кулэ».
ВОВКА (лыдӟе). «Ӧвӧл».
БОРИС. «Дырлы кулэ ӧвӧл». Мар шуэм со?
ЛЫМЫНЫЛ. Тол бабайлэн гожтэмез та.
БОРИС (эшъёсызлы). Эх, тӥ изись гондыръёс! Тол бабаез ныр улысьтыды адӟиллямтэды!
ВОВКА. Нош ачид?
БОРИС. Мынам азям бумага понэмын ӧвӧл ук. Со мон вӧзы лыктымтэ.
ЛЫМЫНЫЛ. Татын эшшо одӥг кыл луыны кулэ.
ВОВКА. Бумага, шуиськод-а?
ЛЫМЫНЫЛ. Бумага яке мукет маке. Тол бабай со бумагаосты татчы юнме шорысь ӧз кельты.
БОРИС. Мар со «маке»?
ЛЫМЫНЫЛ. Котырысьтыды утчаське на. Кисыостэс но эскере. (Пиос котырак утчаськыны кутско). «Маке» сюрыны кулэ.
БОРИС (серемез потэ). Ай, ай, ай! Кисые кин меда маке поныса кельтоз? (Ачиз кисыоссэ бугыръя. Одӥгысьтыз маке поттэ. Паймеменыз синъёсыз паськыт усьтӥсько). Мар та?
ЛЫМЫНЫЛ. Маке со!
ВОВКА. Ой, ой, ой. Кин ке но гондыръёслэсь но зол изем. Кисыяз арбери понэмзэс но шӧдымтэ. (Антонэн ӵош Борис доры матэкто, кисыысьтыз шедьтэм арбериез учко).
АНТОН. Замок ук со!
ВОВКА. Точно, замок!
ЛЫМЫНЫЛ. Удмурт нимыз но солэн вань.
БОРИС. Тунгон? Озьы-а мар-а?
ЛЫМЫНЫЛ. Озьы.
БОРИС. Малы, кызьы со кисыям сюрем?
ЛЫМЫНЫЛ. Тол бабай сое огшоры ӧз кельты, дыр.
БОРИС. Бумагаосын «Дырлы кулэ ӧвӧл» шуыса гожтэмын. Иське, «Тунгон дырлы кулэ ӧвӧл» веран пӧрме.
ЛЫМЫНЫЛ. «Тунгон дырлы» чебер уг кылӥськы.
ВОВКА. Дырлы тунгон кулэ ӧвӧл.
ЛЫМЫНЫЛ. Шонер! Дырез нокыӵе тунгонэн уд пытса, уд дугдыты. Валады-а?
АНТОН. Валамон…
ВОВКА. Ой, мон маке но кынмыны кутски.
АНТОН. Мон но…
ЛЫМЫНЫЛ. Тӥ дырез шӧдыны кутскиды.
Вовка но Антон дор палазы кошко.
БОРИС (Лымыныл шоры учкыса). Кызьы мон Тол бабайлэсь кисыям пырамзэ шӧдӥськымтэ меда? (Лымыныл пельпумыныз выретэ. Борис эшъёсыз сьӧры вамыштэ).
Тол бабай потэ. Лымыныл со доры бызьыса мынэ. Собере кыкназы ӵошен кошко.
Пумыз.
Ульфат
Бадретдинов.
Читайте нас в