-15 °С
Салкым
Антитеррор
Вань иворъёс
Пӧртэм-пӧртэм
23 ноябрь 2018, 14:02

"Тӧдьы юсь"

Бурай ёросысь «Аккош куле» тыэз («Тӧдьы юсь») тросэзлэн адӟылэмзы вань, дыр. Вуж Тазлар гурт вӧзтӥ ортчемлы быдэ ты дуре нуись сюрес вылын машинаос котьку луо.

Тылэн кылдэмез сярысь кемалась тодэме потэ вал. Бурай ёросэ куное вуылыкумы арлыдо песянай «Аккош кульлэн» кылдэмез сярысь мадиз.
Кемалась-кемалась та тыэ тулыслы быдэ юсьёс вуо но пи потто вылэм. Гурт калык со кык юсьёс шоры котьку синмаськыса учкылэм. Тылобурдоосты кышкатонтэм вылысь, вулы васькисьёс куддыр буш ведраосынызы но берытскылӥллям. Но, жаляса верано, асьмеос, адямиос, ваньмы огвыллемесь ӧвӧл. Пӧламы из сюлмо муртъёс но пумисько. Гуртын шедем сыӵе адями, кин мумы юсез ыбыса вием. Со арын кузпалзэ ыштэм юсь гужембыт гурт вӧзтӥ, пе, лобам, ӝожмыт куараеныз кесяськыса, со яратонзэ утчам.
Со арын айы юсь шуныт пала но лобӟымтэ, ты вылын ик тол потэм. Бурдоез жалясьёс солы сиёнэн юрттӥллям. Нош тулыс, куке парен юсьёс шуныт палась берытскиллям, яратонэз сярысь куректӥсь юсь инме ӝутскыса гурт вадьсытӥ кӧня ке поръям но, ассэ музъем вылэ куштэм. Паймоно на мукетызлы но: со мумы юсез ыбыса виись адямилэн корказь азяз ик усем. Со дырысен та тыэ юсьёс пуксьылӥллямтэ ни…
Нош сюлэмтэм пӧй-шурасьлэн улонэз йырин-чукин берытскем. Кышноез кулэм. Воргорон кыкетӥ кузпал ваем. Солэсь выль кышнозэ бадӟым пиез вием. Пизэ пытсаллям. Со тюрьмаын бырыны шедем. Кылем даурзэ пӧйшурась отын-татын ветлыса ортчытэм. Калыкын юнме вераллямтэ, лэся, юсьёсты ыбылыны уг яра шуыса.
Аккошкульлэн кылдэмез мӧзмыт ке но, макем отын шулдыр. Кизган шурлэн кыклы люкиськыса виясь интыысьтыз потэ со. Тылэн быдӟалаез пичи ке но, солэсь мурдалазэ нокин мертаны быгатымтэ на. «Пыдэстэм ты», - шуо со сярысь. Татысь чылкыт ошмес потэ на. Нош кӧня меда ни ты пыдсын усьтонъёс? Созэ но тодыны уг луы, малы ке шуоно семья кылдытӥсь паръёс сюанзы дыръя татчы лыктыса, тунгонэз ӵогаса, усьтонзэ вуэ кушто. Арлыдоослэн верамзыя, та тыэ усьтонзэс куштэм егит паръёслэн семьязы юн, номырин люконтэм, пе, луэ.
Аккошкульлэн вуэз чагырпыръем. Калыкын сое «чагыр ты» но нимало. Ву пыдсы учкыса, трос чилясь векчи коньдонъёсты адӟыны луэ. Соосты отчы ты доры пырасьёс куяло, асьсэлэсь малпанъёссэс вераса, таза но шудо улон курыса. Кызьы пусъё, малпан одно ик быдэсме, пе.
Быдэ вуыса асьмеос малы ке но выжыкыллы оскемысь дугдӥськом. Куддыръя бадӟымъёслы но выжыкыллы осконо, дыр. Оскон ке луиз, шумпотон одно ик лыктэ дорамы. Аккошкуле юсьёс кема аръёс ӵоже лыктытэк ке но улӥллям, гурт калык соосты котьку витем, соослэн берытсконзылы оскыса улэм. Юсьёс вуиллям! Соос бертӥллям! Соосты гуртын улӥсьёс гинэ ӧвӧл, ортчись-мынисьёс но адӟо, синмаськыса учко.
Миляуша
НИГАМАТУЛЛИНА.
Читайте нас в