Ӵуказе Башкортостанысь Тол бабай пиналъёслэсь гожтэтъёссэс кутыны кутскоз

Та нуналъёсы бадӟымъёс пӧлын Выль ар сярысь малпаськисьёс трос ӧвӧл на, дыр. Выжыкыллы сокем юн ум оскиське ни угось. Нош пиналъёс шуркынмон толэзе Тол бабай, Лымы ныл, кузьымъёс сярысь малпаськыны кутско ни. Та нуналъёсы соос Тол бабайлы гожтэт гожтон борды но басьтӥськизы ни, луоз. Нырысетӥ шуркынмонысен солэн почтаез усьтӥськиз.

Туэ 16-тӥ ползэ ни Башкортостанын «Письмо Деду Морозу» проект быдэстӥське. Табере со Семьялэн но Волонтёрлэн арзылы сӥземын. Проектэ 3-15 аресъем пиналъёс пыриськыны быгато. Тол бабай соос азе бадӟымесь куронъёс пуктэ. Кылсярысь, 7-10 аресъем пиналъёслы матысь адямиоссылы юрттэмзы, вордскем шаерзэс утемзы сярысь гожтоно. Со сяна, Тол бабай соосты кӧня ке юанъёслы валэктон сётыны куре на. Ар ӵоже матысьёсыдлы, юрт котырад, гуртад кыӵе пайдаё ужъёс быдэстӥд? Кыӵе вормонъёс басьтӥд дышетсконын, спортын? Кинэн тон данъяськиськод? Малы? Вормонъёстэ грамотаосын, дипломъёсын юнматыны луэ.

Пиналъёслы семьяенызы ӵош бускельёссылы яке мукет тодмоосыдлы кузьым дасяно луоз. Сое аслад киосыныд быдэстоно. Тол бабайлы кузьымдэ кинлы сётэмед сярысь но ивортыны вунэтоно ӧвӧл.

Тол бабай гожтэтъёсты 23-тӥ шуркынмонозь кутоз. Гожтэтэз конвертэн яке электрон почта пыр келяны луоз. Мукет куронъёсын тодматоз http://www.fondufa.ru/news/1648/ сайт. Вормисьёс Выль ар каникулъёсы Тол бабай доры ӧтемын луозы.

Олеся Садыкова.

Читайте нас в

Учредитель: Агентство по печати и средствам массовой информации Республики Башкортостан

Регистрационный номер: Свидетельство ПИ № ТУ02-01536 от 6 июня 2016г. Главный редактор: Нигаматуллина Оля Борисовна

Газета "Ошмес" - общественно-политическая, социальная, культурно-просветительская газета удмуртов Республики Башкортостан.

Телефон

Телефон+7 (34778) 2-11-89, 2-18-71

Электронная почта

[email protected]

Адрес

452830, Республика Башкортостан, Татышлинский район, с. Верхние Татышлы, ул. Ленина, д. 91