Эсэмэскаос

Пияшлэн куашкам мылкыдыз ымныраз но адӟиське. Нокинэн вераськемез уг поты. Таӵе дыръя со кытчы ке адямитэм интые мынысал но отын огназ улысал. Озьы уг луы. Урокъёсты уд кельты. Тани туннэ нош ик алгебрая урок кутскиз. Милена Васильевна пиналъёслэсь гуртын быдэстэм ужъёссэс эскере. Лёнька соосты капчиен лэсьтӥз, дышетӥсь юаз ке, валэктыны быгатоз. «Мынэсьтым уз юа со, – ас понназ малпаське пияш.– Сямыз сыӵе. «Кык» басьтӥсьёс урод отметказэс тупатон сярысь асьсэос сюлмаськыны кулэ шуэ, лэся. Нош четверть йылпумъяськытозь одӥг арня гинэ кылиз на. Кизэс ӝутыса класс азе потӥсьёсты пиналъёс уг ярато. Соку ик «выскочка» ним лякозы». Озьы малпаськон вакытаз Лёнькалэн кисыысьтыз сотовой телефонэз дырекъяны ӧдъяз. Сое нокин ӧз кылы, дыр – куараез кысэмын угось. «СМС вуиз, лэся, – пияш котырак учкиз, нокин ӧз шӧды шуыса валатскиз. – Кин мыным СМС лэзиз меда? Огшоры нуналэ соос воксё уг вуо. Классысь пиос гинэ куддыръя мар но со гожъяло. Али ваньзы татын. Алгебра урокын телефондэ кисыысьтыд уд потты, Милена Васильевна адӟиз ке, соку ик классысь уллялоз, урок бере кыльыны косоз на. СМС-эз переменаын гинэ лыдӟо ни». Телефонэз нош ик дыректӥз. Кыкетӥез СМС вуиз. «Кинлы мон кулэ луиськем?» – Лёнька ӧз чида ни, бур кизэ кисыяз донгиз но соку ик Милена Васильена шоры учкиз. Дышетӥсь но шораз учке. Му пыр вияно кадь луиз – пияш ма карыны уг вала ни, ымнырыз ӵыж-ӵыж гордэктӥз.

– Леопольд, сонгро луид, оло?! – класс тыр кеськиз Владик Чужегов. Лёнькалы со сыӵе кушем ним лякиз, ачиз котьку озьы гинэ вазиське.

– Артамонов, тон ваземме ӧд кылы-а, мар-а? – либытак вазиз дышетӥсь. Лёнька итыысьтыз султӥз, Милена Васильевна шоры учкыны ӧз дӥсьты ни, йырзэ уллань лэзиз.

– Класс азе поты, – куриз дышетӥсь. Артамонов вамыштӥз доска пала.

– Тетрадьдэ басьты, – косӥз Милена Васильевна. «Гуртын быдэстэм ужез валэктыны косӥз-а, мар-а? Мон номыре ӧй кылы», – малпаны вуттӥз Лёнька. Класс азе султӥз но гуртын лэсьтэм задачаез вераны кутскиз.

– Артамонов, контрольной ужысьтыд янгышъёстэ тупатӥд-а? – юаз дышетӥсь, Лёнькалэсь веранзэ куспетӥ карыса. Дышетскись могак луиз, ма вераны уг тоды ни.

(Ульфат Бадретдиновлэсь вероссэ быдэсак лыдӟоды газетмылэн вуоно номеръёсысьтыз).