Сьӧд зарезь дуре вуылӥ

Та дырозь зарезез суредъёсысь но телевизорысь гинэ адӟылэме вань вал. Туэ гужем мыным Сочи городэ, Сьӧд зарезь дуре, вуылыны шуд усиз. Сюрес туж кузь вылэм. Поездэн кык суткалэсь но кема мыноно. Сочиын куазь пӧсь. Будосъёс но асьме палан кадь ӧвӧл. Трос цитрусовой но экзотической писпуос. Сьӧд зарезе вуэм бере, ми анаен яр дурын кема долкаса сылӥм ай: собыдӟа вулы паймыса. Собере пылаським, шунды шорын кыллим. Мон медузаосты кутылӥ. Лодкаосын юри нулло, зарезез адӟыто. Кыдёкегес кошкемъя, зарезьлэн вуэз чылкыта, дельфинъёсты но адӟим.

Сочи – туж чебер город. Шутэтскыны лыктэмъёс отын трос. Нунал экскурсиосы ветлӥм. Нырысь ик «Олимпийской» парке мынэммы потӥз. Олимпиадалы туж зол дасяськиллям вылэм. Мыным тужгес «Кырӟась фонтан» кельшиз. Со олимпиадалэн факелэз доры тупатэмын.

«Куамын куинь водопадъёс» доры но вуылӥм. Выжетӥ тубоно, собере котырскыса васьконо. Со водопадъёс улын пыласькисьёс но вань. Мыным вузы кезьыт потӥз. Чай будэтон плантациосты но адӟим. Пӧртэм чайёссэс веръяны сётӥзы. Сыр лэсьтыны но дышетски, пӧртэм-пӧртэм сыръёсыз веръямы.

Сочи – гурезё инты. Шуръёссы отын пичиесь но ӝог бызё. Экскурсиосын со шуръёс вамен ЗИЛ машинаосын потамы. Туж шурдыт, ву пазяське. Но шулдыр!

«Ривьера» парк но йырысьтым уг кошкы. Маиз гинэ отын ӧвӧл! Лумбыт ветлӥд ке но, вань аттракционъёсты уд ортчы, дыр. Со паркын ик дельфинарий но, пингвинарий но, зоопарк но вань. Мыным дельфинъёслэн шоузы туж кельшиз. Бадӟым будэм бере, мон но отын ужасал. Аквапаркын нош кыӵе усто вал! Бертэм но уг поты вал.

Одӥг арня Сочиын улэм бере, доре бертэм потыны кутскиз. Эшъёсылэсь, дорлэсь мӧзми. Юнме уг шуо вылэм: «Куноын умой, нош дорын умойгес».

Елена

ФАТКУЛЛИНА.

Читайте нас в

Учредитель: Агентство по печати и средствам массовой информации Республики Башкортостан

Регистрационный номер: Свидетельство ПИ № ТУ02-01536 от 6 июня 2016г. Главный редактор: Нигаматуллина Оля Борисовна

Газета "Ошмес" - общественно-политическая, социальная, культурно-просветительская газета удмуртов Республики Башкортостан.

Телефон

Телефон+7 (34778) 2-11-89, 2-18-71

Электронная почта

[email protected]

Адрес

452830, Республика Башкортостан, Татышлинский район, с. Верхние Татышлы, ул. Ленина, д. 91