Дунтэк улмо

Венгриысь Эрд городын улӥсь Пап Эрика Андреа озьы аслыз мултэс луэм улмозэ но грушазэ мукетъёслы дэмла. «…Садады емышъёсты ке трос, соосты мукетъёслы ӵектэ. Мон оскисько, кин ке но туж шумпотоз. Мон гожтыса понӥ, улмооcын но грушаосын пакетъёсты дун тырытэк басьтыны луэ шуыса. Вуз карисько шуыса, медаз малпалэ... », - гожтэ со.

Таӵегес ик суредэз Эстониысь Тарту городысь но адӟеме вань. Отын нимаз коркаосын улӥсьёс садазы будӥсь улмооссэс коробкаосы тырыса, ульчае потто. Ортчись-ветлӥсьёс, нокыӵе кариськытэк, кӧня кулэ, сомында улмо асьсэлы басьто но сюрессэс азьланьто.

Нош асьме палан сыӵе адямиос, мукетъёс сярысь сюлмаськисьёс, вань меда? Муртлы сётытозь, пудоослы сётыны дыртӥськом. Яке инкуазен сётэм ваньбурмы писпу, куак улэ ик сисьме. Тау кылъёс кылэммы уг поты, лэся. Удмурт калык визькылаз юнме уг шуы: «Адямилы ӟеч лэсьтыса, ачид но ӟечгес луиськод».

Анна БАЙДУЛЛИНА.