-18 °С
Салкым
Антитеррор
Вань иворъёс
Пӧртэм-пӧртэм
20 Куарусён 2018, 16:51

Няньлэн дуныз

Бызем бере, гуртын улыку ай, уждуре мынон сюрес вӧзы ю бусы кыле вал. Котыръяськыса ветлонтэм, мон со бусы пыр поталляй. Гуртысь пиналъёс но школае дыртыкузы со бусыез лёгаса потылӥзы. Одӥг нуналэ вотэсбамын бугыръяськыкум, мон ож дыръя улэм егит пияшлэсь тодаз вайыса гожъямъёссэ синйылтӥ.

«1942-тӥ ар. Армиысь егитъёс ваньзы ожмаськонэ кошкизы. Гуртэ пересьёс, кышномуртъёс, пичи пиналъёс гинэ кылизы на. Секыт сётӥськиз котькинлы но. Фашистъёс быдэс гуртмес ӝуатыса ортчизы. Улэп кылем калык землянкаосын улӥз. Сютэм улоно луиз. Осконмы ю бусы вылэ гинэ кылиз на. Нош со аре чабей удалтэмын ке удалтэмын вал!
Ожмаськон кыдёкын ке но, инбамысь ыбылӥськись самолётъёсты ми адӟыны быгатӥськомы вал. Тани одӥг пӧсь гужем нуналэ кык «мессеръёс» (немец самолётъёс) урмем кадь асьмелэсь «як» самолётмес зӥбыны кутскизы. Ыбылӥськон гуртмы вылын кыстӥськиз. Самолётъёс кема гинэ ожмаськизы. Ыбылӥськон куспетӥ одӥгез «мессер» ӵындӥз но бускель гурмы вадьсы из кадь уллань усиз. Кыкетӥез фашист самолёт кышкаса ас палъёсаз лобиз.
Асьмелэн «душесмы» огназ кылиз. Пичияк лобамез бере, со пушкысь ӵын потыны кутскиз. Ми кышкатскимы. Сое ыбизы?!
- Со улын - паськыт бусы. Умой луысал асьме самолётлы пуксьыны, - малпай мон ас поннам. Лётчик кутскиз ни вал каллен отчы васькыны, нош берло малы ке но самолётсэ ӝогак гинэ берыктӥз но бусы сьӧры лобиз. Отчы ик со пуксиз. Интыез пичи но вырйыло луэмен, самолёт йырин-чукин луиз.
Эшъёсыным со самолёт вӧзы бызьыса мынӥм. Лётчик улэп на вал. Ми солы юрттӥськыны вырим. Самолётлэсь бурдзэ ӝутыса солдатэз поттыны турттӥм. Нош кужыммы милям чик ӧй вал. Лётчик сое валаса кеськиз: «Кошке татысь, бызе, самолёт тани-тани пуштоз!» Али ке но пель сьӧрам солэн верамез: «Ю бусыдэс уте!» Самолёт пазьгиськиз…»
Тӥни кызьы луэ вылэм со: аслэсьтыз улонзэ чигыса, лётчик ю-нянез утем. Со валам, кӧня адямиос гуртъёсын но ож бусыын сютэм кыллё шуыса. Ма, со аръёсы котькудӥз тодэ вал, мар со сыӵе нянь. Соин ик, кызьы быгатӥзы, озьы вань сюлэмзэс поныса ю бусыосыз утизы.
Жаляса верано, туала арын няньлэн дуныз воксё ӧвӧл ни. Тросэз пичиос, егитъёс нянез пыд улазы но костало, урамысь жуг-жаг куян интыосы куштыса кельто. Зэм, асьмеос ум тодӥське, мар со сыӵе сютэм улон. Со туж умой. Шумпотоно, турынлэсь но потлэсь пыжем няньлэсь шӧмзэ ум тодӥське шуыса. Но со понна няньлэн кулэлыкез бырыны кулэ шат? Асьмеос котьку нянь будэтӥсьёслэсь ужзэс гажаны но тодыны кулэ, кӧня кужымзэс сёто соос, асьмелэн ӝӧк выламы ческыт нянь мед луоз шуыса. Нянь - со улон угось!
Наталья ШУШКОВА.