Краснодар крайын

Краснодар край пушкы Адыгея элькун интыяськемын. Мукет ласянь учконо ке, сое Россилэн лымшорпал пумыз шуыны луэ – Абхазия борды пыкъяське угось кунгож.

Туэ асьме пала гужем туж кема лыктыны выриз. Куартолэзе воксё кезьыт вал. Оло оскоды, оло уд, инвожо толэзьлэн кутсконаз, гужемез «утчаса», мон Краснодар крае лобӟоно кариськи. Асьме дорын соку ветровкаостэк ветлыны кезьыт йӧтылӥз. Краснодаре вуи но – куамын градус пӧсь. Тӥни кытчы кугӟам гужеммы.

Краснодар кар мыным туж кельшиз. Вылтусыныз но, калыкеныз но, емышъёсыныз но. 1920-тӥ арозь карлэн нимыз Екатеринодар вылэм. 1792-тӥ арын эксэй Екатерина II казакъёслэн Черномор округзылы Кубань музъемез кузьма. Вуоно араз та музъем вылын выль город кылдэ. Эксэйлы тау карыса, карлы Екатеринодар ним сёто. 1860-тӥ арын Екатеринодар луэ Кубань улосвыллэн шоркарез. Та улосвыллэн нимыз, быдӟалаез трос пол вошъяськылӥз. Озьы ке но со (табере Краснодар ни) шоркар ик. Мыным вунонтэм кылиз шоркарысь Галицкий парке, Солнечный шормуӵе ветлэме. Сергей Галицкий – со миллиардер, «Магнит» вузкарон сетез кылдытӥсь, аслаз коньдонэныз Краснодаре футбол стадион пуктӥз. Стадион вӧзы 25 гектар вылэ шутэтскон парк усьтӥз на. Сергей Николаевич – «Краснодар» футбол клублэн президентэз. Пинал футболистъёсты дасяны Академия но кылдытӥз. Вордӥськем шаерез понна сюлмаськись бизнесмен Краснодар карлэн дано адямиез луэ.

«Солнечный» шормуӵ – пиналъёслэн но, бадӟымъёслэн но яратоно шутэтскон интызы. Кубань шурен кылдытэм шормуӵ котьма ласянь чебер, отын ваньмон дырез пайдаё ортчытыны трос луонлыкъёс кылдытэмын…

Краснодар крайын 26 городъёс. Сочи, Анапа, Геленджик, Новороссийск, Туапсе каръёс тросэзлы тодмо, соос Сьӧд зарезь дуре пуксемын. Анапае ветлыны мыным но шуд усиз. Сьӧд зарезьын пыласьки но, ява.

Краснодар крайын тол кузь ӧвӧл, толшоре кутске но тулыспалэ йылпумъяське. Куд-ог аръёсы лымы воксё уг луы. Куартолэзе отын зэмос гужем. Инвожое ю-нянез утялтыны кутско. Быдэс арлы шоро-куспо температура 12 градус шуныт…

Та крайын улӥсьёсыз вить но ӝыны миллионлэсь уно. Тужгес но трос Краснодарын – 899 сюрс. Шорлыдын вераса, крайысь котькуд квадрат километрын 74 адями улэ. Та лыдпусъя со Россиын (Москва улосвыл бӧрсьы) кыкетӥ интыын.

Одӥг арня улыса, мон Ижевске берытски. Краснодарысь пӧсез сьӧрам ӧти ке но, со мынэсьтым ӧз кылзӥськы, лэся. Удмурт, Башкир шаеръёсамы озьы ик салкым возиськиз.

Мон выльысь кошки Краснодаре. Таяз учыре машинаен. Кык нунал мынӥм, 2 сюрс кык сю иськемез ортчим. Краснодарын озьы ик пӧсь. Кызьы со шунытэз асьме пала нуоно меда? Кызь кыкетӥ инвожое Краснодарысь Ижевске самолётэн бертӥ. Таяз учыре «пӧрмиз» кадь – лымшорысь пӧсь мон сьӧры «лыктӥз» – 23-тӥ инвожое Удмуртиын 28 градус шуныт вал ни.

Куное ветлыны умой. Нош дорын шутэтскыны солэсь но ӟеч. Вордӥськем палъёсмы синмаськымонэсь!

Ульфат Бадретдинов.