-23 °С
Яркыт
Антитеррор
Вань иворъёс
Пӧртэм-пӧртэм
19 Июля 2018, 17:11

Улыбкинлэн дэремез сярысь?

«Улыбкина рубашка» – озьы нимаське мынам алигес поттэм выль книгае. Пиналъёс понна гожтэм веросъёсын, чебересь суредъёсын бичет (сборник) со. Та книгаме Маша но Серёжа внукъёсылы сӥзи. Али соос букваосты но уг тодмало на, куке но ӵужатайзылэсь гожтэмъёссэ асьсэос лыдӟыны быгатозы.

Сборниклэн азькылаз мон тазьы гожтӥ: «Та книга Улыбкинлэн дэремез сярысь ӧвӧл, озьы ке но солы «Улыбкина рубашка» ним сётӥ. Мыным татын ачиз Улыбкин дуногес. Сямъёсызъя, выросъёсызъя со покчи тодмоосылы, озьы ик пичи дырысьтым мыным кельше. Улыбкинэз книгаысь одӥг веросысь гинэ пумитаны луэ, мукетъёсаз со ӧвӧл кадь, озьы ке но котькудаз произведениын та пияшлэн палэнысен пальпотыса учкемез шӧдӥське. Сенька Улыбкинлы ваньмыз тунсыко потэ. Книга лыдӟыны яратэ, адӟем учыръёсыз сярысь эшъёсызлы тунсыко мадьыны быгатэ, аспӧртэм юанъёс сётъялля».
Сенька Улыбкин пиналъёслы туж тунсыко юан сётэ: «Когда рубашка бывает травой?» Та юанлы валэктон ӟуч кылын гинэ утчано. «Ку дэрем луэ турын?» юанлы удмурт кылын тунсыко валэктон уд шедьты. Зэмзэ вераса, куд-ог предложениосты ӟуч кылысь удмуртэ берыктыку, тунсыкез быре яке пуштросэз воштӥське. Тани мынам «Мар со кадик?» книгае вань. Ӟуч кылэ сое «Что такое кадик?» шуыса берыктӥм. Ӟучъёс пӧлысь нокин но вераны уз быгаты, мар со кадик. Веросын кык пиос верасько. «Магазинэ кадик ваиллям», – шуэ одӥгез. «Мар бон со?» – юам мукетыз. «Марзэ уг тодӥськы, кыӵезэ тодӥсько», – вера нырысетӥез. «Кыӵе?» – юатэк уг чида кыкетӥез. «Тон кадь ик, дунтэм вузаське». Та пиослэсь вераськемзэс ӟуч кылэ берыктӥд ке, кылын шудон быре. Озьы ик Улыбкинлэн дэремез но кылын шудон.
Книгаям сизьым верос пыртэмын. Ваньмыз сямен тылобурдоос, пӧйшуръёс но гурт пудо сярысь. Валамон ни, соосын артэ пиналъёс но бадӟымъёс. Котькуд учырез гожтӥ, покчи лыдӟисьёсылы котырысьтымы бурдоосты, пӧйшуръёсты гажан мылкыд пыӵатыны сюлмаськыса. Кызьы пӧрмиз, али шуг вераны.
Книгаме чеберманы егит суредась Марина Гузаева юрттӥз. «Кизили» журналэ со трос иллюстрациос лэсьтылэ. Книгаосты, учебникъёсты но чеберма. Та удмурт кышномурт али Польшаын (картсэ отчы ужаны ӧтиллям) улэ. Отысен ик Марина Геннадьевна книгаелы иллюстрациос лэсьтӥз.
Лыдӟисьёс книгаысьтым Улыбкинлэн юанэзлы валэктон уз шедьтэ. Лыдӟемзыя куд-огез валатскозы, кин ке, оло, кема утчано луоз на. Ӧд ке шедьтэ, Улыбкин сямен пальпотэ, соку валэктон ачиз тӥ доры потоз.
Ульфат Бадретдинов.
Читайте нас в