-17 °С
Салкым
Антитеррор
Вань иворъёс
Пӧртэм-пӧртэм
16 Июля 2018, 18:40

Вамышъя, мусое

Тани нош тон сюрес кузя вамыштӥськод. Тодӥсько, нош ик мон доры лыктыны потӥд. Аръёс ортчо, нош тон монэ уд вунэтӥськы. Куазь шоры учкытэк, арлэн пӧртэм дыръёсаз гурезь выллань дыртыса мон доры вамышъяськод.

Эх, анай, анай! Кыдёкысен мугордэ адӟыса шумпотӥсько: анае лыктэ. Валасько мон - мӧзмиськод. Мон но туж мӧзмисько. Толалтэ ми пала сюресъёс уг луо, пеллясь лымы ас ужзэ лэсьтэ ук. Озьы ке но тон сюрес шедьтӥськод, кускозяд лымые выйылыса ке но дорам вуиськод. Котмемдэ но, кынмемдэ но уд шӧдӥськы соку. Пукиськод, вераськод, сюлэм шугъёстэ монэным люкиськод. Нош кӧня кузьымъёс тон мыным ваид ини?! Тулыс куазен лымыгырлы сяськаос яке италмас ваиськод. Сӥзьыл шу, палэзь, яркыт буёло куаръёс кельтӥськод. Нош котькыӵе кузьымъёслэсь но дуногес монэ яратэмед, тодад воземед. Одӥг пол монэным вераськыса сылыкуд писпу вай вылэ яркыт буёло тылобурдо пуксиз. Тон бӧрдӥськод, нош со чирдэ ук, ой, чирдэ. Тон йырдэ ӝутыса учкид но, тылобурдолэсь куаразэ кылыса музъем вылэ кымин усид. Кыӵе мон тонэ соку жаляй! Анай! Кема улӥд тон соку, музъем вылысь ӝутскыны быгатытэк. Нош чебер тылобурдо весь кырӟаз, весь кырӟаз…
Эх, анай, анай! Тынад яратонэдлэсь бадӟымгес дунне вылын маке вань на меда? Секыт куректондэ вормыса, ачид тодыса гинэ улӥськод. Секыт со, мон валасько тонэ. Валасько но, жалясько но, озьы ке но номыре воштэме уг луы ни. Оло нош улонэз берыктыны луысал ке, оло соку мон тонэ сокем вӧсь ӧй карысал, ачим но вӧсь ӧй луысал. Но уг луы озьы, анай, номыре берыктэме уг луы ни. Уйёсы, тодӥсько, кӧлэмед уг луы. Монэным вераськиськод, туспуктэмме вешаса, мусояса уйдэ уйбыт пукиськод.
Эх, анай, анай! Отысен, вылысен, котькуд вамыштэ адӟисько, шӧдӥсько, валасько. Анай, тон вамышты, вамышты, та дунне вылтӥ. Монэ малпаса вамышъякуд мыным капчи луэ. Анай, уйёсы инбам шоры учкыса, монэным вераськыкуд мон адӟисько тонэ, тон вань дыръя мон но вань. Мон валасько вӧсьдэ, валасько секыт шуыса. Вазь ӵукна ӝутскись шунды сьӧры салам тыныд ыстӥсько. Шуныт пельтӥсь тӧлэн бордад йӧтскисько. Уй кизилиос пӧлын шорад учкыса кырмышъясько.Анай,тонэныд артэ вамышъясько мон, вож турынэн пыд улад валиськисько, яркыт сяськаосын котырад пазьгиськисько. Нош кайгуэд вормонтэм секыт зӥбе ке, мон каллен гинэ кутӥсько, пограны уг лэзиськы тонэ.
Эх, анай, анай! Вамышъя, мусое…
Ирина Самигулова.