Интернетын трос калгид ке, зэмос вотэсэ но шедёд

Интернет вотэс егитъёслы ог-огзэс шедьтыны, семья кылдытыны но юрттэ вылэм. Но куддыр таӵе амалэн тодматскон улонлы-тазалыклы кышкытлык но кылдытыны быгатэ. Алигес республикаысьтымы одӥгаз городын улӥсь егит пи интернет вотэс пыр «яратонзэ» шедьтэм. Кӧня ке тодматскемзы-вераськемзы бере, соос пумиськыны малпаллям. Но отчы егит ныл интые тодмотэм пиос вуиллям. «Муртлэсь яратонзэ лушкаськод»,- пыкылӥллям соос «яратонзэ» утчаса вуэм пиез. Табере солы пумиськонзы сярысь тодаз вайыто мугорысьтыз лызэктэм интыосыз но ышем телефонэз.

Вотэслэсь мукет бамзэ «усьтӥ». Гожъяськисьёс таяз но лыдӟисьёс сярысь сюлмаськиллям, трос тунсыкозэ гожтӥллям. Нош соосты лыдӟыса малы ке кышкыт, шурдыт луэ. Кылсярысь, одӥгаз материалын уж дуразы мынӥсь воргоронъёслэн авариын быремзы сярысь гожтэмын. Отын ньыль пиосмуртъёслэн улонзы чигем. Нош мукетаз интернет-мошенникъёслэн кырсь ужъёссы сярысь верамын. Туймазы ёросысь анай нылпиосызлэсь пыдкутчанъёссэ интернет пыр вузаны малпам. Со понна «Авито» сайтэ ялон сётэм. Но анай пыдкутчанзэ но вузамтэ, коньдонзэ но ыштэм. Ялонын пусъем телефон номере фотоен смс вуэм. Берло тодмо луиз, смс-ын вредоносной программа вань вылэм. Нылкышно сое усьтыку, телефон но сӧриськем, банковской картаысь 6,5 сюрс манет коньдон но ышем.

Нош Нефтекамскысь нылкышно со сайт пыр ик губи вузаны малпам. Солы тодмотэм пиосмурт жингыртэм, ресторанын ужасько шуыса ивортэм. Нылкышно солы картаезлэсь номерзэ сётэм. Но малы ке отчы коньдон пырымтэ, 15 сюрс манетлэсь тросэз ышем гинэ.

Интернетме валантэм мылкыдын дугдытӥ. Солэн вотэсъёсысьтыз выль иворъёсты лыдӟеме пумысен шумпотоно яке куректоно меда? Та выллем чуръёс котькуд нунал ке но интернетын «калго», калыклы соос визь ӧвӧл кадь. Адямиос нуналлы быдэ сямен нельке (капканэ) шедё.

Ольга ГИЛЬМУРАНОВА.