Ӵыдонтэм мусо гуртэ

Эшъёс, учке ай тӥ котыре,Тани мынам атай юртэ. Ваньмыз со вордӥськем шаере! Бальзюгае, пичи, мусо гуртэ, Шунды сиосын лӥятэ со монэ. Тани татын вордӥськи, Татын ик ваньмызлы дыши. Лэсьтӥ нырысь пичи вамышъёсме, Верай шуныт анай кылме. Валай ужме, ӟеч калыкме, Чебер улонлэсь ческыт шӧмзэ. Ваньмыз тон борды пыӵамын, шаере. Чылкыт омыр, кыдатэ мугорме... Тани вамыштӥсько Лолгоп кузя, Италмас яркыт сизэ пазя. Сяртчыкыр, Пуртыгоп, Аркагурезь, Сокем удалтэ узы-боры но эмезь. Юзмыт вуэныз секта Шординошмес, Гажаса куноя, кыске ваньзэс. Жильыр жильыртыса бызе Покшур, Уӵы мытэ шулдыр крезьгур. Бусыосын веттасько ю-няньёс, Пальпотса учко шорам зангариос. Тӧлъя веттаськыса сыло кызьпуос, Шутэтскыны вӧзазы ӧтё соос.Ӵыдонтэм ик мусо мынам гуртэ, Сӥзьыл, тулыс но котьма вакытэ. Данъясько мон тыршись калыкме, Гажасько, яратӥсько удмурт сямме. Тулыс ӝужась сяська выллем, Улэ но ӝутӥське вордӥськем шаере! Ирина КАБИПЯНОВА.