Тӧдьы сяська - льӧмпу сяська

Тулыслэсь шулдыресь нуналъёссэ бакча ужъёслы сӥзем кузпалъёс туннэ но убооссы котырын бергало. Жадем воргорон кӧня ке минутлы гинэ корказ пыриз но отысь ӝутскем мылкыдын потӥз. Кышноез паймыса шораз учке.

- Кузпалы, дугды ай, дугды. Радио пыр ивортӥзы: ӵуказе но, пе, нунал луоз, - пальпотыса вера воргорон.

Зэм, асьмеос вазь тулысысен бер сӥзьылозь садын, бакчаын бергаськом. Шулдыр гужемлэсь ортчемзэ но шӧдытэк кылиськом. Ум быгатӥське гужемлэсь одӥг нуналзэ «лушкаса» шутэтскыны потыны. Оло, потэммы уг поты? Ку асьмеос ӵуж пуныжильыосын «нюръяськиськом», городысь шутэтскыны вуэмъёс со шунды тусо сяськаос вӧзын туспуктэм лэсьтыны тыршо, интернет вотэсъёсы тыро. Чебересь туспуктэмъёсты учкыса паймиськом, кытысь соос сыӵе шулдыр инты шедьтӥллям шуыса.

Оскиськоды-а, уд-а – туэ тулыс кечсин сяськаосты адӟыны нюлэскы ӧй пота. Нош Пермьысь эше юри со понна бертылӥз: мӧзми, пе, нюлэс зынлэсь, кечсинъёслэсь. Котьма ке но шуид, городын улӥсьёс шутэтскыны быгато ини.

Тулыслэн берпуметӥ нуналъёсыз. Ӵыдонтэм дыр. Кыӵе гинэ буёлъёсыныз уг гочаты инкуазь! Кызъёс – пеймыт-вож тусо, турын – ненег вож, кызьпуос но бадьпуос лакен пазямын кожалод, беризьёс – бездыт-вож тусынызы висъясько. Али гинэ льӧмпу сяськаос шоры синмаськыса учкыса сылӥ вал, йыры ик берытскиз ческыт зынлэсь. Туннэ ини сирень сяськая. Кематэк со но сяськаоссэ виятоз. Тулыс инкуазь туж ӝог воштӥське угось, жаляса верано, асьмеос со чеберлыкез адӟыны дыр ум шедьтӥське. Умой луысал, инкуазь чеберлыкъёсты синйылтыны быгатысалмы ке.

Альфия САЛИМГАРАЕВА.