Гуртэлы

Выльысь вуи гуртам, кема ни вал бертам, Кызьы меда таӵе кема чидай? Васьки ошмес дуре, юи кезьыт вузэ, Каньыл луиз мынам мӧзмем сюлмам. Пичи дыръя сямен ожо вылтӥ каллен Гольык пыдын ортчи Танып кузя. Танып визыл бызе, мыным оло вазе: «Малы ӝегатскиськод таӵе кема»? Тупал вож возьвылъёс, лулпу арамаос, Ӵуж шундыен пиштӥсь купанчаос Азьло кадь ик ӧтё, азьло кадь ик витё Соос шоры вазиськемме мусо. Мон бертӥсько ке но, кошкисько ке но Йыбырттӥсько, Кереметэ, тыныд. Дуно вордэм гуртэ, мусо Кызыл-Яре, Дорад котьку ӧте монэ сюлмы. Дуно гуртоосы – Поска, Какся выжы – Мыкыртӥсько йырме тӥ азяды. Йылолъёсмес-сяммес, югыт тылзэ гуртлэсь Синчебердэс кадь ик утемдылы. Татьяна ХАРИСОВА. Пермь шаерысь Бадӟым Березник гурт.