Штӥяк вӧсь люказ калыкез

Арлы быдэ пӧсьтолэзьлэн кыкетӥ арнянуналаз Янаул ёросысь Каймашабаш гуртын Штӥяк вӧсь ортче.

- Арлыдоослэн верамзыя, азьло Штӥяк вӧсь мукет сяменгес ортче вылэм. Со Быдӟым вӧсен лыдъяськем. Отчы Норкан, Барабановка, Арлян, Банибаш гуртъёсысь но лыкто вылэм. Котькуд гурт вӧсе мар ке но сётэ, пе, вылэм. Вакыт пӧртэм сямен вошъяськыса улэмен, азьло вӧсяськонлы пумит мынӥсьёс трос луэмен, вӧсьлэн радлыкез кӧня ке воштӥськем. Сое асьме гуртэн гинэ карылӥллям на, - вера Каймашабашысь библиотекаын ужась Гольфира Байназарова. - Шумпотоно, берло дыре Штӥяк вӧсьмы бадӟыма шуыса. Туэ вӧсьын бускель гуртъёсысь лыктэмъёс, городъёсысь бертылэмъёс но трос вал.

Штӥяк вӧсьын ӵӧж, дас ыжпи вӧсязы. Инмарлы тау карыса, шудо-буро улон курыса вазиськизы сизьым куриськисьёс: Ф. Ахметгареев, Д. Абдиев, Ф. Алетдинов, Д. Милитдинов, С. Фатихов, Р. Кабиуллин но И. Милитдинов.

- Ӵӧж сётӥз Янаулысь Сирина Галякберова, ыжпи сётӥзы Янаулысь  Сергей Шабутдинов, Норканысь Артём Минлибаев, Арлянысь Виталий Юсупов, Удмуртиысь Завьял ёросысь Каменное гуртысь Лариса Тимерзянова но Каймашабашысь Виталий Мингалиев, Данис Абдиев, Ильдар Милитдинов, Данис Милитдинов, Флюс Алетдинов, Рафкат Кабиуллин. Бадӟым тау вӧсез радъясьёслы, отын пӧрасьёслы. Куриськеммы кабыл мед луоз, - вера Г. Байназарова.

Тыл вылын дас куинь пуртыын пӧзем ӵын шӧмо ӝукез котькудӥз ас понназ куриськыса веръяз, луоз. Уго асьмелэн осконмы - чылкыт инкуазь. Со асьмемыз ваньбуреныз шумпоттэ.   

Фото: КайМашаБаш