Азязы мед усёз

Удмуртъёс даурысь дауре утё кулэм ӵыжы-выжыоссэс сӥлы карон йылолъёссэс. Матысь адямиосмес ноку но ум вунэтэ ке но, араз кык пол, тулыс но сӥзьыл, соосты буре вайыса, кисьтон ортчытӥськом на. Тулыс кисьтонэз тыршо 1-тӥ яке 9-тӥ куартолэзь азьын карыны. Малы ке шуоно, соку палэнын улӥсьёс но бертыло, кулэмъёслы куяськыны мыныны быгато. Туэ Быдӟымнал 28-тӥ оштолэзе тупаз. Арня орчыса гинэ, 5-тӥ куартолэзе, сое келян йылолэз ортчытӥм. Быдӟымналэз келятэк, тулыс кисьтон карыны лэземын ӧвӧл. Тросэз со сярысь уг тодо ни. Соин ик, вылды, удмурт гуртъёсын но шай пала 1-тӥ куартолэзе ик калык кыстӥськиз.

Тулыс но сӥзьыл кисьтонын сиёнъёс пӧлы пыро калягаен (кӧжыен) ныро, табань, перепеч, шаньги, сӥньысэн вандылэм курегпуз, курег лым (Татышлы ёрос сямъя). Кисьтон дыръя пыжиськемез пуртэн вандыны уг яра. Таба зын поттыны, пуктӥськыны, ки сьӧрлань куяськыны, азязы уськытыны – таӵе кылъёсты кылоно луэ та йылолэз ортчытыку гинэ. Ышемын ӧвӧл на породэн ветлон – та ужрадэз атай палтӥ ӵыжы-выжыосын ортчытон (кин отчы пыре, одно ик тыршо нырысетӥ кисьтон ортчытэм коркан кадь ик дасяськыны, доразы ӧтьыны).

Кисьтон ортчем бере ӵуказеяз мынӥськом шайвылэ. Отын куяськиськом, буре ваиськом, кулэм ӵыжы-выжыосмылэсь шай котырзэс сузяса кельтӥськом, сӥзьыл кисьтонтэк кисьтон кароно медаз луы шуиськом. Туэ тулыс кисьтон йылоллэсь видеосъёмказэ Татышлы ёросысь Уразгильды но Петропавловка гуртъёсын лэсьтӥзы Эстониын ужась тодосчиос, фольклорист Николай Анисимов но антрополог Ева Тулуз.

Анна БАЙДУЛЛИНА.