Тол вӧсьын Инмарлы вазиськизы

Шуркынмон толэзьлэн берпуметӥ шутэтскон нуналаз Бадӟым Гондырысь, Барабанысь, Киргаысь, Кипчакысь удмуртъёс вӧсь лудэ люкасько. Отын «Тол вӧсь» ортче. Туэ со 26-тӥ шуркынмонэ тупаз. Вераны кулэ, берло аръёсы вӧсь йылол татын паськытгес радъяськыны кутскиз. Кылсярысь, туэ Бадӟым Гондыре вӧсь ӝукез веръяны пӧртэм интыосысь куноос вуизы: Башкортостанысь, Пермь шаерысь Чернушка ёросысь, Удмурт Элькунысь но мукет интыосысь.

Оминь! Чузъяськиз котыре вӧсясьёслэн куаразы. Вӧсь лудын чалмыт луиз. Та вакытэ люкаськем калык но ас понназ Инмарлы вазиськиз кадь. Дыр вуиз тыл вылын пӧзьтэм ӝукез веръяны. Та нуналэ со тямыс пуртыын пӧзиз. Ӝуклы кеньыр калыклэсь октӥзы, нош сӥлен «Горд кужым» СПК (кивалтӥсез Олег Фатталов) юрттӥз. «Туннэ Инмарлы Киргаысь Леонид Зартинов но Фарит Садиев вазиськизы. Нош Бадӟым Гондырысь ми куинь кузя вал – Виталий Сакриев, Ментемыр Менгалиев но мон. Куриськеммы кабыл мед луоз», - вера валтӥсь вӧсясь Михаил Менгалиев.

Вӧсяськем ӝукез веръямзы бере, калык Бадӟым Гондырысь культура юртэ кыстӥськиз. Татын соос понна «Дӧдьы кыткон» шулдыръяськон радъяськиз. Зэм, кузёослэн ужрадзэс берлолыгес выжтон сярысь малпанзы но кылдэм вылэм. Инкуазь лымыен уг шумпотты на угось. Озьыен, дӧдьы кыткон дыр но вуэмын ӧвӧл на. «Ум выжтэ, аръёс ӵоже радъяськись ужрадлэсь дырзэ ум воштэ», - вераз интыысь удмурт огазеяськонэн кивалтӥсь С. И. Гадиятов. Бадӟым Гондыръёслы но люкаськем калыклы лыктэм куноос сцена вылысен трос шуныт кылъёссэс веразы. Пермьысь калык творчествоя юртын ужась М. Е. Суханова но шумпотон мылкыдзэ усьтытэк ӧз чида. Со Бадӟым Гондырысь удмурт калыклэсь сюлмысь тыршемзэ пусйиз.

Та вакытэ палэнынгес кык шаплы валъёс конкурсэ пыриськисьёсты витё ни вал. Но, жаляса верано, малы ке соосты кыткыны но юскыны мылкыд карисьёс туж ӧжыт луизы. Огез гинэ паймытӥз: валэз нылкышноос но усто но шаплы кыткыны быгато вылэм. Ужрадэз гозы кысканэн но мукет со выллем конкурсъёсын, шулдыръяськонэн азинтӥзы. Нош собере люкаськем калыкез шулдыр удмурт кырӟанъёсын паймытӥз Удмурт Элькунысь вуэм «Тулкым» ансамбль.

Ольга НИГАМАТУЛЛИНА.

Пермь шаерысь Куеда ёрос.

(Тросгес туспуктэмъёс сайтын возьматэмын).