«Дышетӥсьлэсь ужзэ мон ӧй бырйы, со монэ бырйиз»

Калтасы ёросысь Бадӟым Качакысь Элеонора Суфиярова гуртысьтызы школаын дышетскыкуз ик тодӥз: дас одӥгетӥ классэз йылпумъяса, кияз аттестат кутӥз ке, со дышетӥсьлэсь сюрессэ быръёз. Нылпиослы одно ик математикая тодон-валан сётоз. УдГУ-ысь математикая, информационной технологиосъя но физикая институтэз горд дипломен йылпумъям дышетӥсь туннэ но валэктыны уг быгаты на, лыдпусъёс, пӧртэм гожъёс, формулаос но теоремаос маин сое бордазы кыскизы. Угось школаын дышетскон аръёсаз солы котькуд предмет капчиен сётӥськиз. Эмчи ке ӧвӧл, солэсь биологияя но химияя усто дышетӥсь пӧрмысал. Историез но со нылпиослы усто валэктысал. Озьы ке но математикаез бырйиз. Та нуналъёсы со ӵемысь школаысьтызы математикая дышетӥсьсэс син азяз пуктэ.  Фирая Имамутдиновна Гизитдиновалэн предметсэ усто валэктэменыз ик, оло, пиналлэн сюлмаз алгебраез, геометриез гажан мылкыд пыӵаз. Элеонора Эдуардовна ноку ӧз жаля на, дышетӥсь луиз шуыса. Студент аръёссэ но со шумпотыса тодаз вае, нырысетӥ сётэм урокъёссэ сюлмаз возе. «Дышетӥсьлэсь ужзэ мон ӧй бырйы, со монэ бырйиз», - серем пыр вера егит дышетӥсь.

Вылӥ дышетскон юртэз йылпумъям ӧнерчи азе паськыт сюрес усьтӥськиз. Со вордскем палъёсаз бертон сярысь но малпаськиз, Ижкар но чеберлыкеныз гочатӥз кадь. Озьы 2019-тӥ арын Элеонора Эдуардовна Ижевскысь одӥгаз школае ужаны вамыштӥз. Та вакытэ со шумпотӥз: гуртысь ныл пичи дырысьтыз бадӟым малпанзэ быдэстыны быгатӥз. Озьы ке но сюлмызлэсь  дор палъёсаз куриськемзэ шӧдӥз. 2020-тӥ арын шаерамы «Земский учитель» программа быдэстӥськыны кутскиз. Элеонора Эдуардовна со сярысь тодӥз но, кема малпаськыса ӧз луы, отчы пыриськиз. «Анай-атаелы, семьялы матэгес кариськем потӥз», – вера со, лэсьтэм вамышсэ тодаз вайыса. Со сяна, дышетӥсь гурт нылпиослэсь пуш дуннезэс но умойгес вала. Дор палъёсызлы матысь дышетскон юртъёс пӧлысь отчы Янаулысь И. Ш. Муксинов нимо гимназия заявка сётэм вылэм. Со дырысен дышетӥсь республикамылэн уйпал городысьтыз гимназиын тырше. Солэн борддоръёсыз сьӧрын Элеонора Эдуардовна ассэ дораз выллем шӧдэ ни. Татысь коридоръёсты со сизьыметӥ арзэ лёга. Нылпиослэн гажаса учкемзы со понна туж дуно луэ.

Элеонора Суфиярова сярысь быдэсак лыдӟыны быгатоды газетмылэн 30-тӥ куарусёнэ потэм номерысьтыз.