Башкортостанын 196 сюрс пинал Россиысь калыкъёслэсь кылзэс дышетэ

Башкортостанысь школаосын но нылпи садъёсын анай кылъёсты уже кутонлы, сое дышетонлы бадӟым саклык висъяське. Валтӥсь дышетон кыл - ӟуч, озьы ке но соин артэ мукет кылъёсты но дышетыны луонлык кылдытэмын.

«Туала дышетскон ар кутсконын дышетон юртъёсын Россиысь калыкъёслэсь (ӟуч кыл сяна) кылъёссэс нимаз предмет чотын 196 сюрслэсь трос пиналъёс дышето. Соос пӧлысь башкир кылэз бырйиз 156,2 сюрс адями, бигерзэ - 34,3 сюрс, порзэ - 2,9 сюрс, чувашсэ - 2,2 сюрс, удмурт кылэз, предметэз сямен, 595 дышетскись дышетэ», - верамын Башстатлэн ивортоназ.

Нылпи садъёсын но анай кыл сярысь уг вунэто. Кылем арын отчы Башкортостанысь 186,2 сюрс пинал ветлӥз. Соос пӧлысь 91,2%-эз, яке 169,8 сюрс пиос но нылъёс, ӟуч кылын дышетскизы. Башкир кылын дышетон группаосы 18,8 сюрс покчиос (10,1%) ветлӥзы, бигер кылын — 1,9 сюрс (1%). Чуваш но удмурт кылын дышетон группаосын 200-лэсь трос пиналъёс вал.

Кылъёсты утёнын бадӟым инты басьто библиотекаос. РБ-ысь Лулчеберетъя министерстволэн ивортэмезъя, 2025-тӥ ар пумозь республикаын 1555 библиотека лыдъяськиз. Россиысь калыкъёслэн (ӟуч кыл сяна) кылъёсынызы литературалэн фондэз 5,3 миллион экземплярлы ӵошаз  - со огъя библиотечной фондлэн 20,6%-эз луэ.

«Котькуд калыклэн кылыз - солэн лулчеберетэзлэн инъетэз, кудаз пыро сям-йылолъёс, адямиез гажан, Атыкай музъемдэ но семьядэ яратон», - йылпумъязы Башкортостанысь статистикъёс.

Туспуктэм: МБОУ ПМШ с. Новые Татышлы МР Татышлинский район