+14 °С
Салкым
Общество
18 августэ , 11:34
Уфаысь егит пиез вотэс бамын йыртэмамез понна кыл кутытӥзы
Россия Федерациысь ФСБ-лэн Башкортостанысь управленияз ужасьёс Уфаысь 23 аресъем егит пилэсь кышкыт ужен выремзэ шараязы. Со интернетын калык азьын терроризмез шонере поттылӥз, экстремизм ужен вырыны ӧтиз, озьы ик нацизмез выльдытонлы дурбасьтӥз.
ФСБ-лэн Башкортостанысь пресс-службаезлэн ивортэмезъя, воргорон одӥгаз интернет-мессенджерын ватэм канал кылдытӥз. Отын со аслэсьтыз урод малпанъёссэ шарае поттылӥз. 2025-тӥ арын южтолэзе юрттэт басьтон но выль гожтӥськисьёсты кыскон понна со Москва улосвылысь Красногорскысь «Крокус Сити Холл» концерт залын теракт лэсьтэм калыккуспо террористической огазеяськонлэсь ёзчиоссэ шонере поттыса гожъяз.
Берлогес со каналаз кужмысь ужъёс ортчытыны ӧтьыса вазиськиз, куд-ог адямиосты быдтыны ӵектӥз. Быдӟым Атыкай ожысь ветеранъёс сярысь тужгес урод мылкыдын вераськиз.
Уголовной ужез эскерыкузы воргорон аслаз янгышез сярысь вераз. Центральной округысь военной суд Уфаысь егит пиез терроризмен герӟаськем статьяосъя янгыше уськытӥз но сизьым ар пытсэт сьӧрын пуконэн кыл кутытӥз. Табере солы интернет сайтъёсын но каналъёсын ньыль ар ӵоже ужано ӧвӧл. Кыл кутытэмзыя, нырысетӥ кык арзэ воргорон тюрьмаын пукоз, собере - чурыт режимен колониын. Кыл кутытэмзы кужымаз ӧз на пыры.
