Тюменьын Гербер ортчиз

Тулыс бусы ужъёсты йылпумъянлы сӥзем праздник туала арын гуртъёсын гинэ ӧвӧл, бадӟым городъёсын но радъяське. Удмурт калыклэн азьветлӥсь нылъёсыз но пиосыз анай кылзэс шаермылэн котькуд сэрегаз паськыт возьыны тыршо.

Тюменьын трос аръёс ӵоже удмурт лулчеберетэз азинтон бордын татысь удуртъёслэн огазеяськонзы тырше. О.В. Капитоновалэн кивалтэмез улсын «Оскон» ансамбль городын орчись ужрадъёсын удмурт калык кырӟан-эктонъёсты возьматэ. Озьы ик Тюменьын трос аръёс ӵоже Гербер праздник радъяське. Арлы быдэ отчы Башкортостан, Татарстан республикаосысь но Свердловск улосвылысь ансамбльёс вуо. Туэ но Тюменьысь удмуртъёс ужрадэз мултэс ӧз каре - Гербер яркыт но шулдыр ортчиз.

Празднике вуэм калыкез «Оскон» ансамбль, оген кырӟасьёс Мартина Идылбаева но Ангелина Григорьева, гармонист Ольга Данилова шулдыртӥзы. Со сяна, учкисьёс шуныт пумитазы Свердловск улосвылысь «Эгес» удмурт огазеяськонлэсь «Азвесь гур» ансамбльзэ.

Та нуналэ «Оскон» ансамбль «Пукон корка» фольклор композиция но возьматӥз. Чебересь костюмъёс, яркытэсь декорациос удмурт калыклэсь узыр лулчеберетсэ возьматӥзы.

Гербер шулдыръяькон эшъяськон хороводэн но удмурт калык шудонъёсын йылпумъяськиз. Татын котькудӥз ассэ возьматыны но сюлмысь шутэтскыны быгатӥз.