Бордаз сяськаясь кылбурчи дунне улэ

Туннэ нуналэ но Алтау гуртын таланто адямиос уло. Соослэн быгатонлыкъёссы быдэс дуннее тодмо ӧвӧл ке но, тыршемзы синмаськымон но паймымон луэ.

Сария Минтимеровна Габидуллина быдэс улонзэ вордскем гуртэзлы сӥзиз. Кожалод, пичи гинэ мугоръем кышномурт мукет гурт нылкышноослэсь номырин уг висъяськы, нош соин тодматскыса, солэсь малпанъёссэ валаса, бордысьтыз чебер сяськаяськись кылбурчилэсь дуннезэ усьтод.

Гуртысьтызы школазэ йылпумъяса, Сария Минтимеровна Сарапулэ бухгалтерлы дышетскыны пырыны вуэм. Нош малпам ужез быдэсмымтэ – егит ныллы отчы инты шедьымтэ. Соку солы агрономлы дышетскыны ӵектӥллям. Сария Габидуллина соглаш луэм. Нош кык-куинь толэзь дышетскыса, отысь берлань гуртаз вуэм.

- Туж возьдаськисько вал кузь горд йырсиелэсь, бамысьтым пужыослэсь. Сарапулын но соин дышетскыны ӧй быгаты: котькин бордысь серекъям туссэс адӟисько вал.

Собере егит ныл Свердловскын но, Ижевскын но ужаз. Нош кытчы гинэ ӧз вуы, возьдаськон сямыз сое сьӧд вужер выллем улляз. Соин, лэся, сюлэмыз котьку но вордскем гуртаз куриськиз. Татын со ассэ оскымон шобрет улын сямен потӥз.

Сария Габидуллина гуртысьтыз ик егит пилы бызиз. Валерий кузпалыныз соос кужмо семья кылдытыса, ньыль нылпи будэтӥзы. Туннэ нуналэ нуныоссы быдэ вуыса анай-атай юртысьтызы кошкизы. Кузпалъёс асьсэ киынызы ӝутэм бадӟым юртазы соослэн шудзылы но вормонъёссылы шумпотыса уло.

Сария Габидуллиналэн нырысетӥ кылбур чуръёсыз пиезлэн школаез йылпумъямезлы сӥземын вал. Соку кышномурт гуртысьтызы колхозын скал кыскись луыса ужаз. Пиезлэн сётоно экзаменъёсызлы, бадӟым улонэ потэм сюресэзлы сюлмаськись анай сюлэмын кылбур чуръёс кылдӥзы. Берпуметӥ гырлы жингыртон нуналэ, школаез йылпумъясьёсты ӟечкыласа Сария Габидуллина кылбурзэ кырӟанлы пӧрмытыса «Шур бызе» кырӟан гурен быдэстӥз.

(Быдэсак материалэз лыдӟыны быгатоды газетмылэн 13-тӥ куартолэзе потэм номерысьтыз). 

Венера ИЛЬБАЕВА.