«Торатау» Конгресс-холл финн-угор калыкъёсты люказ

Заседание огазеяськонлэн Россиысь тямыс регионъёсысьтыз ёзчиосыз пыриськизы. Соос финн-угор калыкъёслэсь кылзэс, культуразэс утён но азинтон сярысь вераськизы, трос лэчыт ужпумъёсты ӝутӥзы.

«Калыкмылэн лыдыз трос-а, ӧжыт-а – ваньмы выжыосмес утьыны тыршиськом, - шуиз Петр Тултаев. – Башкортостанын финн-угор калыкъёс кема аръёс ӵоже уло ни. Татын тросгес поръёс, удмуртъёс но мордваос. Толон Татышлы но Мишкино ёросъёсы вуылӥм, отын трос тунсыкозэ адӟим. Татышлы ёросын, кылсярысь, удмурт кылэз 1-11-тӥ классъёсын дышето. Со сяна,  башкир кылъя но урокъёссы вань. Шумпотоно, соослэн анай-атайёссы но пумит нылпиоссылэн трос кылэз дышетэмзылы пумит ӧвӧл».

Заседаниын Башкортостанысь удмуртъёслэн улонзы, ужзы, национально-культурной центрлэн ужрадъёсыз сярысь трос тунсыкозэ вераз НКЦ-ен кивалтӥсь Л. Л. Зидымаков. Со сяна, трос шуныт кылъёссэс веразы Башкортостанысь культурая министрлэсь ужзэ быдэсъясь Ф. Р. Шайхисламов, Удмуртиысь Кун Кенешлэн тӧроезлэн воштӥсез Т. В. Ишматова но мукетъёс.

Пыр-почгес лыдӟыны быгатоды газетмылэн вуоно номерысьтыз.