Башкортостанысь удмуртъёс диктант гожтӥзы

Диктантэз котьку сямен «Мынам Удмуртие» радио но «Удмуртия» телеканал пыр меӵак эфирын лыдӟизы. Озьы ик вань мылкыд карисьёс понна нимысьтыз площадкаос радъяськизы. Трос луизы соос Башкортостанын но. Площадкаос Кушнаренко ёросысь Канлыысь библиотекаын, Татышлы ёросысь Улысь Балтачысь, Бадряшысь школаосын но Выль Татышлыысь Башкортостанысь удмуртъёслэн лулчеберетъя центразы, Янаул ёрос библиотекаын, Шудекысь библиотекаын, Вуж Варашысь, Сандугачысь но Каймашабашысь школаосын, Ермекей ёросысь Суккулово школаын, Бурайысь гимназиын но Калтасы ёросысь Бадӟым Качакысь культура юртын усьтӥськизы. Диктант гожтыны нылпиос но, бадӟымъёс но шумпотыса вуизы.

«Диктантлы  сётэм текст милям школаысь нылпиосмылы туж тупась, малы ке шуоно дышетскисьёсмы пӧлын вань ӟучез но, бигерез но, удмуртэз но, башкирез но. Пуштросэз туж тунсыко, валтӥсь малпанэз - эшъяськон. Текстын пумисько сложной предложениос (кушето), огъясь кылъёсын, однородной членъёсын, прямой речен, деепричастие вӧлскетэн предложениос. Текст туж секыт ӧвӧл, правилоосты тодӥсь нылпиослы со капчиен сётӥськиз», - вера Улысь Балтач школаысь дышетӥсь Ю. Ш. Кайранова.

Калтасы ёросысь культура юртын малпазы, диктантэз 15 адями гожтоз шуыса. Нош 11-тӥ оштолэзе татчы солэсь тросгес адямиос люкаськизы. «Диктант гожтыны калык ачиз мылкыд карыса лыктӥз, - вера Башкортостанысь удмуртъёслэн НКЦ-зылэн Калтасы ёросысь филиалэныз кивалтӥсь Венера Ильбаева. – Калтасы ёросын диктант гожтыны мылкыд карисьёслэн лыдзы арысь аре йылэ. Туэ отчы Бадӟым Качакын, Чиндэрын, Бадӟым Туганеевоын улӥсьёс пыриськизы. Текст капчиен сётӥськиз. Вуоно арын Бадӟым Туганеевое но площадка усьтыны малпаськом. Отын но диктант гожтыны мылкыд карисьёс трос. Бадӟым удмурт диктант гурт калыклы огинэ люкаськыса сюлмысь вераськыны луонлык сётӥз».

Кушнаренко ёросын удмуртъёс одӥг гуртын – Канлыын – уло. Озьы ке но соос анай кылзэс  утьыны, сое азинтыны тыршо. Канлыос арлы быдэ «Бадӟым удмурт диктант» акцие пырисько. Туэ но соос клубе трос люкаськизы. Диктантэз Ахметово школаысь дышетӥсь Э. В. Сайфутдинова лыдӟиз. Та нуналэ удмурт кылэз тодэмзэ эскерыны малпаз нимысьтыз военной операциысь ветеран Андрей Сайфутдинов но.  

Каймашабаш школаын диктант гожтыны 30 адями люкаськиз. Татын парта сьӧры пиналъёсын артэ бадӟымъёс но пуксизы. Тросэзлэн удмурт кылэз дышетэмзы бере трос аръёс ортчемын ке но, диктант гожтон пумысен бадӟым шугъяськонъёссы ӧз луэ. Школаысь удмурт кылъя дышетӥсь З. С. Ибраева текстэз лад-лад лыдӟиз уго. «Текст мур пуштросо. Валамон гожтэмын. Ас кылдэ тодон, яратон, мукет кылэз гажан мылкыд пичи нылъёс пыр зол пыӵатэмын. Тау авторезлы! Текст гожтӥсьёслы но туж кельшиз», - вера Земфира Садретдиновна.

Та выллем мылкыдзэ шарая Сандугач школаысь дышетӥсь Л. Х. Магданова но. Татысь школаын дышетскисьёс понна текст тужгес матын луиз. Уго Сандугач школаын аръёс ӵоже ни пӧртэм анай кыл кузёяське. Татын башкиръёс, бигеръёс, ӟучъёс, удмуртъёс, поръёс ог-огенызы эшъяськыса будо, дышетско. Соин текстысь пичи нылъёслэн эшъяськонзылэн кужымзы но соослы тодмо.

Вуж Варашысь школае диктант гожтыны 27 адями люкаськиз. Соос пӧлысь трос "Бадӟым удмурт диктант" акцие арлы быдэ пырисько. Соин текстъёсты но ог-огенызы ӵошатыны быгато. "Туэ диктантэз гожтыны секыт ӧй вал. Солэн пуштросэз но тунсыко луиз", - верало Вуж Вараш школаысь площадкаын ужасьёс. Нош тыршемзылэсь емышсэ соос матысь дыре тодозы. Ужъёссэс школаысьтызы дышетӥсьсы, диктантэз лыдӟись А. А. Фаткуллина эскероз.