"Дыр ортчемъя, мон яратӥсько шыпытлыкез..."

Яратӥськод ке…

Яратӥськод ке, яраты сюлмысь,

Эн пожа вал ныллэсь малпанъёссэ.

Укыр гольтрес кылъёсыныд

Эн бездыты солэсь чагыр синзэ!

Яратӥськод ке, яраты сюлмын,

Лякыт сямын, визьмо кылын.

Чылкыт ошмес вуэз пожам сямен,

Эн иса тон чебер егит нылэз!

***

Юмша уйин инмын толэзь,

Кӧлыны монэ чылкак уг лэзь.

Кизили пиштэ, ворекъя,

Я ватске, шудэ, кырмышъя.

Кӧлод меда таӵе уе?

Малпанъёс выё пыдлось гаде.

Тулыс тӥни йырзэ мыче,

Шапыкъёс усьыло му вылэ.

Выль гуръёс куара сёто сюлмын,

Улон шокче выль кужымен.

Уйвӧтъёсын ӵош дунне сайка,

Кысэм яратон выльысь гома.

***

Дыр ортчемъя, мон

Яратӥсько шыпытлыкез,

Лушкемен пельтӥсь

Инкуазь тӧлэз.

Ӵукна шундыё,

Ненег выль нуналэз,

Шудо серекъямез.

Дыр ортчемъя, мон

Яратӥсько зэмлыкез.

Ватскисько урод сямлэсь,

Кышкасько люкиськонлэсь.

***

Ошмес синмысь адӟи асме,

Ӟечлы я уродлы меда?

Лысву кадь ик вуэз чылкыт,

Ватӥськыса сямен веръяй сое.

Ву вогыри  вылаз вӧлске,

Монэным, шуод, ӟечбуръяське.

Нош мон лушкем возьдаськыса,

Ӵушылӥсько синвуосме.

Буйгатӥз сюлэмме ӟеч малпан,

Мылкыдме бурдъяз ошмес гур.

Тон мынам ошмес син эмъюме,

Вуыло тон доры мон ялан.

Выль югдытэм сюресъёсыд,

Кузьмалозы вамыш азьлань!