Калыклы котькуд нунал ву кулэ

Берло аръёсы Татышлы ёросысь Калмиярын улӥсьёслэн одӥгез валтӥсь ужпумзы луиз ву гумыослэн вужмемзы. Гуртэ со 1985-тӥ арын кыскемын. Табере корт трубаос араз олокӧня пол «кышъямез» кулэ каро. Калыкмы кезьыт тол куазен но, пӧсь гужем но вутэк кыле. Соин туэ ми «Программа поддержки местных инициатив» проектэ пыриськыса ву гумыосты тупатыны малпам.

Малпанмес быдэстон понна 26-тӥ толшоре, 12-тӥ толсуре огазе люкаськыса кенешим. Со сяна, калык пӧлын юалляськон но ортчытӥм. Озьы ми тодӥм, гуртын улӥсьёслэн сюлмаськонъёссы трос ке но, вутэк азьлане уд вамышты шуыса. Соос ваньзы сямен водопроводэз быдэсак тупатон понна куаразэс сётӥзы. Зэм, кутскем ужез йыллаз-пумаз вуттыны трос коньдон кулэ луоз. Со сярысь ужпумез йылпумъясь кенешонын ӝутӥм. Ву гумыез тупатыны калыклэсь коньдонзэ люкаломы, спонсоръёс юрттозы, муниципалитетлэн бюджетысьтыз коньдон висъяськоз. Со сяна, республика бюджетысь юрттэт луоз. Ужлэсь быдэстӥськемзэ чакланы инициативной группа бырйимы.

«Ву котькуд нунал кулэ, - веразы кенешонын. – Со чылкыт мед луоз, тазалыклы кышкытлык медаз кылдыты». Со сяна, пасяськем гумыостӥ огшоры виясь ву трос ыштонъёс вае. ППМИ улсын быдэстэм проектмы, оскиськом, гурт калыкез чылкыт вуэн тырмытыны юрттоз. Со тылпулэсь утиськонын но бадӟым инты басьтоз.

Валентин ВАСИЛЬЕВ,

инициативной группаен кивалтӥсь.

Автор:Оля Нигаматуллина

Читайте нас

Партнеры