Анай азьын гурезьёс йыбыртто

Бурай ёросысь Мамады гуртысь Мария Галимовалы анай шудлэсь шӧмзэ куинь пол веръяны кылдӥз. Соос кузпалыныз Махмутзян Давлетзяновичен куинь учкымон пиоссэс будэтыса, пыд йылазы султытӥзы. «Пиосы понна ноку возьыт ӧз луы. Дышетсконын но соос асьсэды синмаськымон возьматӥзы, улонын но ӟеч калыклы ярамон луизы», - малпанъёссэ шарая Мария Гилемзяновна.

Галимовъёслэн пиоссы анай-атайзы сямен ик улон сюрестӥ асьсэ кужыменызы юн-юн вамыштӥзы. Соослэн небыт сямо, задор мылкыдо но котькыӵе секыт югдуръёсысь потыны быгатэмзы улонын асьсэды шедьтыны юрттӥзы.

Мария Гилемзяновна сярысь но гурт калыклэсь уродзэ уд кылы. Учкымон анай, данъяськымон кузпал, оскымон эш котьку улонэз валаса но азьпалэз понна тыршыса улӥз. «Вордскем дырысен бусы зынэн пыӵам сюлэмы гуртэным гердзэ чигыны ӧз быгаты. Кузпалэным вордскем интыямы ик юн выжы лэзим. Кыкнамы ик пичиысен ужаса будэмын. Тодӥсько на, куатетӥ классэз йылпумъяса, анаелы колхоз ужъёсын юрттыны ветлӥсько вал. Озьы вазь ӵукнаысен бер ӝытозь беризь вайёсты дасяса, турын люкаса пичи дыры ортчиз шуи ке но, уг янгышы, дыр», - вера Мария Галимова.

Мария Гилемзяновна котькуд нуналлы шумпотыса но шудбурезлы тау карыса улӥз. Нимысьтыз военной операция гинэ шундыё нуналъёссэ сьӧд пилемъёсын согиз. СВО кутскон арын куарусён толэзе мобилизация улсын Артур пиезлы повестка вуиз. Егит пиосмурт, кышкытлыкъёслэсь пегӟыны турттыса, берлань ӧз чигна – вордскем шаерезлэн зэмос пиез сямен тушмонлы пумит султӥз.

(Галимовъёслэн семьязы сярысь пыр-почгес лыдӟе газетмылэн вуоно номерысьтыз).

Автор:Венера Ильбаева

Читайте нас

Партнеры