"Инвожо" ансамбль юбилейзэ пусйиз

Удмурт Шагиртлы 300 ар тырмон ужрадэ Дания Шайкылова, Ракия Кафисова, Мария Мезенцева, Галия Тимирканова, Мелласма Алаярова, Антонида Миллиахматова, Светлана Ахматова, Анна Галяутдинова, Елизавета Тухфатова, Татьяна Гильзатова  но Любовь Садиева нырысьсэ ансамбль луыса удмурт кырӟанъёсын сцена вылэ вамыштӥзы. Соку коллективен Е.Ш. Жданова кивалтӥз.

Со дырысен ӧжыт вакыт ӧз ортчы. «Инвожо» ансамбле ветлӥсьёс но аръёс ортчемъя вошъяськизы. Озьы одӥг бадӟым крезьгур семьяе Римма Михайлова, Анна Алаярова, Альбина Галиева но Виталий Гильзатов вуизы. 2023-тӥ арысен «Инвожо» ансамблен кивалтон ужез Людмила Гильзатова ас вылаз басьтӥз. Жаляса верано, дас вить ар ӵоже удмурт кырӟан-эктонъёсын пыӵам нуналъёсты пусйыны Ракия Кафисовалы но Дания Шайкыловалы ӧз гожты ни.

«Инвожо» ансамбльлэн оскымон эшъёсыз туннэ нуналэ но нырысьсэ сцена вылэ потэмзэс тодазы ваё. Кема гинэ утчаллям соос соку коллективзылы нимзэ. Светлана Ахметова дораз бертыса, борддорысьтыз удмурт календарез синйылтэм. Отын тужгес но чебер нылмурт суредамын вылэм, нош вӧзаз толэзьлэн нимыз – Инвожо. Озьы ик малпан кылдэм ансамбльзэс «Инвожо» шуыса ниманы. Со дырысен 15 ар ӵоже удмурт фольклор ансамбль учкисьёсты удмурт гуръёсын шулдыртэ, Куеда округын ортчись конкурсъёсын но фестивальёсын ӵем гинэ вормисьёс пӧлын луэ.

Юбилейзэ «Инвожо» ансамбль Вуж Шагирт культура юртын пусйиз. Удмурт калыклэсь сям-йылолъёссэ но лулчеберетсэ азинтӥсьёсты ӟечкыланы матысь эшъёссы  вуизы. Капчи мылкыдэн но шуныт кылъёсын пыӵам пумиськон ӝытсы эшъяськон шӧмо праздниклы пӧрмиз.

Удмурт гуръёслы синмаськем адямиос луэмен, «Инвожо» ансамбль азьпалан но учкисьёсты выль кырӟанъёсыныз но эктонъёсыныз шулдыртоз. Озьы Пермь шаерын сяськаяськоз но азинтӥськоз удмурт калыкмылэн лулчеберетэз.

Фото: Старошагиртский дом культуры