Лякыт сямыз нылпиосты бордаз кыске

«Мыным соосын удалтэ, - серем пыр вера визьнодась. – Группаям котьку трос нылпиос люкасько». Дина Сайфутдиновна «Солнышко» нылпи садын 2011-тӥ арысен тырше, татчы со Татышлы ёросысь Уразгильды школаысь выжиз. Отын со пионервожатой луыса ужаз. Школаын тыршем аръёссэ со котьку шумпотыса тодаз вае, ужъя эшъёсызлы тау каре. Нылпиос пӧлын солы кельшиз ке но, Дина Сайфутдиновна котьку шӧдӥз, сюлэмыз покчиос борды куриське шуыса. Школаын дышетсконзэ йылпумъямез бере Благовещенскысь педучилищеын но юнме воспитательлы ӧз дышетскы угось. Бирскын вылӥ тодон-валан басьтыкуз но улонзэ та удысэн герӟаны малпаз. Табере со котькуд нунал нылпи садэ шумпотыса вамыштэ. Шораз пальышаса учкись пиналъёссэ адӟыса, анай-атайёсын вераськыса, сюлэмыз каньылак луэ. Солэн шудбурез та дуно борддоръёс сьӧры ватскемын, кожалод.

Дина Сайфутдиновналэн лякыт сямыз вань нылпиоссэ вормонтэм кужымен бордаз кыске. Соос нылпи садысь школае кошкемзы бере но, яратоно визьнодасенызы пумиськон вылысь, татчы ӵемысь берытско. Берло но нылпи садын ортчытэм аръёссы сярысь шумпотыса верало на. Уго татын соос нырысетӥ кылбуръёссэс веразы, кырӟаны-эктыны дышетскизы, букваосын, лыдпусъёсын тодматскизы. Дина Сайфутдиновна ачиз но крезьгур дуннеен эшъяське бере, группаысьтыз нылпиосын котькуд празднике бадӟым ужрадъёс ортчытыны тырше. Пичильтокъёслэсь быгатонлыкъёссэс учкыны анайатайёссы но лыкто. «Нылпи садын пичиослы котькуд нунал праздник кадь мед луоз шуыса тыршисько. Тыныд пиналзэс оскизы бере, со тон дорысь бурдъяськыса мед бертоз. Нош ӵукна шумпотыса мед лыктоз», - вера Дина Сайфутдиновна.

Вераны кулэ, «Солнышко» нылпи сад аслаз липет улаз пӧртэм калыкъёслэсь нылпиоссэс огазея. Соин татын зэмос эшъяськон кузёяське, ужрадъёсын бигер кырӟанъёсты, кылсярысь, удмурт крезьгуръёс вошто. «Удмурт кылэз валась нылпиос но ӧжыт ӧвӧл, - шуэ Дина Сайфутдиновна. – Соосын анай кылынызы кылбуръёс но дышетыны тыршиськом. Йӧскалык дӥськутлэн нуналаз удмурт дэреммес дӥсяськом». Дина Сайфутдиновна нылпиосыныз ёрос конкурсъёсын но кужымзэ эскерыны тырше, ачиз но быгатонлыксэ возьматыны быгатэ. 2015-тӥ арын, кылсярысь, со «Арлэн визьнодасез» ёрос конкурсэ пыриськиз но кыкетӥ степенё дипломлэн кузёез луиз.