Ёросэн кивалтӥсь Купченее вуылӥз

Отын со нырысь ик выль, юн сылӥсь коркаосты синйылтӥз. Утялтэм урамъёслы вылӥ дунъет сётӥз.

Нырысь ик Рустам Рамилевич гуртысь культурая центре пыриз. Та юртэ интыяськемын ФАП, нылпи сад, библиотека, клуб. Та арозь татын покчи классъёслы школа ужаз. Туэ нырысетӥ сентябре нылпиос бускель Суккулово гуртысь школае вамыштӥзы. Купченейысь нылпи садэ 11 пинал ветлэ.

Кивалтӥсен пумиськыкуз, фельдшер Елена Никитина вераз, гуртысь 350-лы матэ адямилэсь тазалыксэ эскерисько шуыса. Быръем удысаз со 38 ар тырше ни. Со аръёссэ Е. Никитина вордскем гуртэзлы, ас калыкезлэсь тазалыксэ эскеронлы сӥзем. Солэн сюрестӥз ик вамыштэм нылыз но: Виктория Сергеевна ёрос эмъюртысь ӝог эмъюрттэт возьматонъя висъетын ужа.  

Гуртысь клублэн ӧсъёсыз котьку котькин понна усьтэмын. Татын удмурт лулчеберетэз утёнлы, азинтонлы бадӟым саклык висъяське. Купченейёс вашкала сям-йылолъёссэс ӟеч тодо, соосты нылпиоссылы, нылпиоссылэн нылпиоссылы выжтон сярысь сюлмасько. Кылсярысь, гуртысь «Тодэ ваён» фольклор ансамбльлэн кылдэмезлы 70 ар ни.

Гурт удысэз азинтӥсьёс но Купченейын ӧжыт ӧвӧл. Ёрос администрациен кивалтӥсь Инсаф Шарафлисламовлэн КФХ-яз вуылӥз. Ульчаосты ортчытозязы, Суккулово сельсовет гурт поселениен (отчы пыре Купченей) кивалтӥсь Олег Никитин котькудаз юртын улӥсьёсын тодматӥз. Ачиз та гуртысь бере, Олег Михайлович котькинэ умой тодэ, котькуд адями сярысь пыр-поч вераны быгатэ.

Кылсярысь, ортчись-ветлӥсь синйылтытэк уг кельты тунсыко капкаез: Васнецовлэн картинаысьтыз куинь ӟуч батыръёс возьматэмын. О. Никитин тодматэ, та юртын Амосовъёс уло шуыса. Николай Иванович но Надежда Владимировна куинь нылпи будэтӥзы. Николай Иванович кема аръёс ӵоже экскаваторын ужам. Соослэн семьязы мукетъёслы адӟем карымон луэ.

Фото: Ермекеевский район Республики Башкортостан