Башкортостан Республикалэн тӧроез Бирске вуылӥз

Татын со «Промышленной час» ортчытӥз, нылпиослы шудон поттӥсь «Спектр» предприятиен тодматскиз, нимысьтыз военной операцие пыриськисьёсын пумиськылӥз. Со сяна, со Каринэ кузпалыныз ӵош семьялы сӥзем фестивале пыриськиз.  

Та нуналэ Бирскын выль семья кылдӥз. Анна Рябова но Артур Баляков улон сюрессэс герӟазы. Радий Фаритович егитъёсты сюлмысь ӟечкылаз но соослы шудбур сӥзиз. Собере куноосты патриотической площадкае ӧтизы. Октябрьской площадьын Башкортостан Республикаысь Калыкъёслэн эшъяськон юртсылэн «Вклад семьи в Великую Победу. Ромашка – семейный оберег солдата» интерактивной адӟытонэз ужаз. Сое Быдӟым Вормонлы 80 ар тырмонлы сӥзизы. Куать историяя но культурая центръёс театрализованной представление возьматӥзы. Ӟучъёс Быдӟым Атыкай ож кутскыку ортчись сюанэн тодматӥзы, бигеръёс егит пиосты оже келязы, чувашъёс  ожгарчиослы гожтэт гожтӥзы, удмуртъёс шаермес утисьёслы посылка дасязы, поръёс солдатъёслэсь шутэтскемзэс возьматӥзы. Берло анайёс, кузпалъёс но нылпиос ожгарчиоссэс пумитазы.

Туспуктэм: "Победа" газет