Тыршись адямиез уж шедьтэ

Нош армие ветлыса, Уфаысь аграрной универси­тетэз йылпумъяз. Калтасы­ын налоговой инспекциын ужаз, ёрос администраци­лэн гурт хозяйствоя ёзэтаз тыршиз, культура удысэ но вуиз. Улонэз, кожалод, котьма ласянь веръяз, уч­киз. Котькытын пиосмуртэ шумпотыса пумитазы, со но калыкен огкыл шедьтыны быгатӥз. Озьы ке но Вадим Викторовичлэн сюлэмез интыяз ӧй вал, кытчы ке ку­риськиз, мае ке утчаз.

- Улонын котькуд ужез шум­потыса быдэсъяно, выль нунал­лы пальпотыса султоно. Ужед шумпотон уг вайы ке, иське, со тынад ӧвӧл, аслыд тупась удыс утчано, - вера Вадим Шараев. - Мон но асме кема утчай, ӧй вала кытчы сюлэмы вазиз. Нош огпол, коркаме вутыкум, корт­лэсь чеберъяса ӧс тупатӥ. Туж чебер пӧрмиз. Нырысь семьяе ужме дунъяз, собере - эшъёсы но тодмоосы. Паймоно кадь, адямиос кортлэсь чеберъяса лэсьтэм арбериосты курыны кутскизы. Нырысь одӥгезлы лэсьтӥ, собере мукетызлы. Нош тужгес но бадӟым ужез быдэстэм бере сюлэмы ӝуаны кутскиз. Тӥни маин вырыны кулэ! Сюлэм куре бере, со уж мынам, дыр, шуыса малпай. Соку ваньмыз ас радаз султӥз. Со дырысен туэ дас одӥгетӥ арзэ кортэн эшъяськисько.

Ӝоген Вадим Шараев ни­мысьтыз ужбергатӥсь луиз. Кортэн ужаны капчи ӧвӧл. Соин нырысь солы пиосыз но атаез юрттӥзы. Ужлэсь кышкасьтэм пиосмуртлы сюрес усьтӥськиз, ужез паськытаса азьпала кош­киз. Соку солы мукет палась юрттӥсьёсты утчано луиз. Мыл­кыд карисьёс ӧжыт ӧй вал ке но, секыт ужез ваньзы ӧз ворме: кин ке кошкиз, кин ке лыктӥз. Берло куать арзэ Вадим Шараев до­рын Егор Климовских тырше. Нош ӝыны ар талэсь азьвыл ужбергатӥсь доры Бадӟым Ка­чакын вордскем но будэм Вла­димир Котов ужаны куриськиз. Удмурт пиосмуртъёс ог-огенызы кыл шедьтӥзы.

Нимысьтыз ужбергатӥсь Вадим Шараев ӟеч ужъёсыныз но данъяськыны быгатэ. Кыл­сярысь, пиосмурт «Атайсал» проект улсын ёросысь пӧртэм гуртъёсы Быдӟым Атыкай ожлы сӥзем даслэсь трос памятникъ­ёс но обелискъёс тупатӥз. Вера­ны кулэ, Бадӟым Качак гуртысь обелиск но солэн киосыныз лэсьтэмын. Со сяна, Вадим Викторович 81 шайвылъёсы ин­формационной стендъёс дасяз, нош Вуж Калтасыысь пор шай­лы нимысьтыз чеберъям капка лэсьтӥз. Со нимысьтыз военной операцие пыриськисьёслы но юрттыны тырше. Озьыен, Ва­дим Шараев СВО-е кортлэсь гур одӥг гинэ ӧз лэзьы ни.

- Калык уг оскы, нимысь­тыз ужбергатӥсь дун курытэк мар ке карыны быгатэ шуыса, - серекъяса вера Вадим Вик­торович. - Нош мон понна улон коньдонлэсь гинэ лэсьтэмын ӧвӧл. «Атайсал» программае пыриськыса, мон калыклы но юрттыны быгатӥ, аслэсьтым выль малпанъёсме уже ку­тыны но луонлык кылдӥз. Ка­лыклы юрттыны дась луись ужбергатӥсьёс ӧжыт ӧвӧл. Мон данъяськисько, соослэн радазы пырисько шуыса.

Вадим Шараевлэн кортлэсь лэсьтэм арбериосаз сюлэм шо­канэз шӧдӥське. Угось котькуд ужзэ со яратыса но вань мыл­кыдзэ поныса быдэстэ. Туннэ нуналэ нымысьтыз ужбергатӥсь Калтасы ёросын гинэ ӧвӧл, бы­дэс республикаын но тодмо луэ шуи ке, уг янгыша, дыр. Солэсь ужъёссэ бадӟым городъёсын но басьтыны мылкыд каро. Озьы­ен, Вадим Викторовичлэн ужез азинтӥське. Шӧдӥське, адями аслаз интыяз.

Венера ИЛЬБАЕВА.