Геройёслы сӥзем партаос усьтӥзы

Проектлэн валтӥсь ужпумез - нылпиослы дано улосчиоссы сярысь веран, кинъёс кышкатэк адӟем карымон ужъёс лэсьтӥзы. Геройлэн партаез сьӧрын пуко ӟеч дышетскисьёс но школалэн улоназ мыло-кыдо пыриськисьёс.

Геройёслы сӥзем ньыль парта алигес усьтӥзы Балтач ёросысь Асавка школаын. Партаос данъяськымон пиослы Эдуард Минниахметовлы, Радмир Галиевлы, Айдар Шараповлы, Рустам Хурамшинлы сӥземын. Соослэн кышкасьтэм луэмзы, тушмон азе вормон сярысь малпаськыса лэсьтэм вамышъёссы сярысь Асавкаысь нылпиос пичиысен ик тодыса будозы.

Вераны кулэ, Асавкаын кышкасьтэм, ужез гажась, тыршись калык улэ. Та гурт дано луэ аслаз пиосыныз. Татын вордскемыын но улэмын кышкасьтэм, данъяськымон улосчимы – Совето Союзысь Герой Ульмас Шакирович Шакиров. Быдӟым Атыкай оже Асавкаысь 138 адями кошкем. Соос пӧлысь 74-езлы гинэ вордскем палъёсазы берытскыны гожтэм. Мукетъёс улонзэс сётӥзы асьмелэн шудо улонмы понна. Чечен ожын бырем Эдуард Минниахметовлэн но подвигез номырин ӵошатонтэм: со улонзэ сётӥз эшъёссэ тушмонлэн ки улысьтыз мозмытыкуз. Эдуард Рафкатович кулэмез бере Мужестволэн орденэныз данъямын. Туннэ но Асавкалэн оскымон пиосыз шаермес утисьёс радын сыло - нимысьтыз военной операцие пырисько. Жаляса верано, тушмон пуля куд-ог егит пиослэсь кужмогес луэ. Радмир Галиев, Айдар Шарапов, Рустам Хурамшин СВО-е пыриськыса, шаермы понна йыгмыт сылӥзы. Р. Галиевлы кулэмез бере Мужестволэн орденэз сётэмын.

Парта усьтон ужрадэ шаермес утисьёслэн матысьёссы, эшъёссы пыриськизы. Соос пиослэсь кылкутӥсь, вордскем шаерзы понна подвигъёс лэсьтыны дась луэмзэс пусйизы. «Сыӵе оскымон пиосмы луэмен, асьмелэн уйёсмы шыпытэсь, ӟардонъёсмы сайкытэсь», – шуизы ужрадэ лыктэмъёс.

Фото: МОБУ ООШ д.Асавка